वीरगंज (पर्सा), २० वैशाख । विश्व प्रेस स्वतन्त्रता दिवसको अवसर पारेर आइतबार वीरगंजमा पत्रकारहरूले प्रभातफेरीसहित विरोध प्रदर्शन गर्दै प्रेस स्वतन्त्रतामाथि भइरहेको हस्तक्षेपप्रति कडा आपत्ति जनाएका छन् । नेपाल पत्रकार महासंघ पर्सा शाखाको आयोजनामा सम्पन्न कार्यक्रम अन्तर्गत गरिएको प्रभातफेरी घण्टाघरबाट सुरु भई माइस्थान, महाविरस्थान, आदर्शनगर, अलखियामठ र घडिअर्वा हुँदै पुनः घण्टाघरमै पुगेर कोण सभामा परिणत भएको थियो ।
कोण सभालाई सम्बोधन गर्दै नेपाल पत्रकार महासंघका केन्द्रीय सचिव अशोक तिवारीले सञ्चारमाध्यममाथि सरकारले गर्दै आएको हस्तक्षेपको तीव्र आलोचना गरे । उनले विशेषगरी निजी सञ्चारमाध्यमलाई सरकारी विज्ञापनबाट वञ्चित गर्ने निर्णयलाई ‘आर्थिक नाकाबन्दी’ को संज्ञा दिँदै उक्त प्रतिबन्ध तत्काल खारेज गर्न माग गरे ।
प्रमुख अतिथिका रूपमा मन्तव्य दिँदै तिवारीले महासंघ हाल यही विषयलाई लिएर आन्दोलनरत रहेको जानकारी दिँदै सरकार आफ्नो निर्णयबाट पछि नहटे अझ सशक्त आन्दोलनमा उत्रिने चेतावनी दिए । उनले सरकारका असंवैधानिक कदमविरुद्ध अन्तर्राष्ट्रिय मञ्चमा समेत आवाज उठाइने र आवश्यक परे संयुक्त राष्ट्रसंघसम्म मुद्दा पुर्याइने स्पष्ट पारे ।
कार्यक्रममा नेपाल पत्रकार महासंघ पर्साका अध्यक्ष ओमप्रकाश खनालले सत्तामा पुगेपछि राजनीतिक दलहरूले प्रेस स्वतन्त्रता कुण्ठित गर्ने प्रवृत्ति दोहोरिने गरेको आरोप लगाए । उनले विपक्षमा हुँदा प्रेस स्वतन्त्रताको पक्षमा बोल्ने दलहरू सत्तामा पुगेपछि भने सञ्चारमाध्यमलाई नियन्त्रण गर्न खोज्ने व्यवहार देखाउने गरेको टिप्पणी गरे ।
खनालले सञ्चारमाध्यमले सत्ताको मनोमानीमाथि निगरानी राख्ने भएकाले नै यसलाई कमजोर पार्ने प्रयास भइरहेको धारणा राखे । उनले प्रेस स्वतन्त्रता जोगाउन पत्रकारहरू एकजुट हुनुपर्नेमा जोड दिए ।
खनालको अध्यक्षतामा सम्पन्न कार्यक्रममा प्रेस चौतारीका केन्द्रीय सदस्य विजय भण्डारी, समाजवादी प्रेस संगठन मधेश प्रदेशका अध्यक्ष मनोज पटेल, जिल्ला अध्यक्ष शम्भु कुमार सुमन तथा प्रेस सेन्टर पर्साका अध्यक्ष शिवनाथ यादवलगायतले पनि मन्तव्य राख्दै वर्तमान परिस्थितिमा प्रेस स्वतन्त्रताको संरक्षणका लागि एकताबद्ध संघर्ष आवश्यक रहेको बताएका थिए ।
कार्यक्रममा सहभागी पत्रकारहरूले प्रेसमाथि देखिएको हस्तक्षेप तत्काल अन्त्य गर्न र सञ्चारमाध्यमलाई स्वतन्त्र रूपमा काम गर्न अनुकूल वातावरण सिर्जना गर्न सरकारसँग माग गरेका छन् ।
प्रतिक्रिया दिनुहोस् !