हावाहुरीले घर उडाउँदा पाँचजनाको परिवार खुला आकाशमुनि

वीरगंज (पर्सा), १६ वैशाख । जिराभवानी गाउँपालिका–२ सेढवामा आइतबार राति आएको भीषण हावाहुरीले एक विपन्न परिवारको बासस्थान पूर्ण रूपमा ध्वस्त बनाएको छ । करिब राति ११ बजेतिर असिना र मुसलधारे वर्षासहित आएको तीव्र हावाहुरीले धर्मराज राम चमारको दुई कोठे कच्ची घरको फुसको छानो उडाइदिएको मात्र होइन, भित्तासमेत भत्काएर घरलाई भग्नावशेषमा परिणत गरिदिएको हो ।

प्राकृतिक विपत्तिपछि घरभित्र रहेका अन्नपात, लत्ताकपडा तथा दैनिक प्रयोगका भाँडाकुँडा समेत नष्ट भएका छन् । ‘कति दुःख गरेर जोहो गरेको सबै सामान एकै रातमा सकियो,’ भन्दै पीडित चमारले आफ्नो पीडा व्यक्त गरे । पाँच सदस्यीय उनको परिवार अहिले खुला आकाशमुनि बस्न बाध्य छ, जहाँ चर्को घाम, हावाहुरी र वर्षाले झनै कष्ट थपेको छ । रात पर्नासाथ असुरक्षाको भयले उनीहरू झनै त्रसित हुने गरेका छन् ।

दैनिक ज्यालादारी गरेर गुजारा चलाउँदै आएका चमार परिवारसँग आफ्नै जमिनसमेत छैन । सुरक्षित आश्रयको अभावमा बाँचिरहेका उनीहरूका लागि यो विपत्ति थप संकट बनेर आएको छ । अहिले पीडित परिवारले सम्बन्धित निकाय र सहयोगी संस्थाहरूसँग तत्काल राहत तथा पुनःस्थापनाका लागि सहयोगको याचना गरेका छन् । ‘अब कहाँ जाने, कसरी जीवन धान्ने ?’ भन्ने चिन्तासँगै उनीहरू सहयोगको पर्खाइमा छन् ।