वीरगंज (पर्सा), १४ वैशाख । वीरगंजको प्रमुख सडक त्रिभुवन राजपथको मापदण्डअनुसार सडक विस्तारलाई स्पष्ट र व्यवस्थित बनाउन केन्द्रविन्दु निर्धारणको प्रक्रिया मंगलबारदेखि सुरु हुने भएको छ । यसका लागि सम्बन्धित निकायहरूबीच सहमति भई नापजाँच कार्य अघि बढाइने तयारी पूरा गरिएको छ ।
सोमबार वीरगंज महानगरपालिकामा महानगर प्रमुख राजेशमान सिंहको अध्यक्षतामा बसेको संयुक्त बैठकले सडकको वास्तविक केन्द्रबिन्दु पहिचान गरी सो स्थानमा स्टिलका किल्ला गाड्ने निर्णय गरेको हो । बैठकमा जिल्ला प्रशासन कार्यालय, सडक डिभिजन कार्यालय हेटौँडा र नापी कार्यालय पर्साका प्रतिनिधिहरू सहभागी थिए ।
यसअघि सडक विस्तारका क्रममा केही संरचना हटाइएपनि सडकको केन्द्र कहाँ पर्छ भन्ने स्पष्ट नहुँदा स्थानीयवासी अन्योलमा थिए । विशेषगरी ‘कति दूरीसम्म संरचना हटाउनुपर्ने हो’ भन्ने प्रश्न उठ्दै आएको थियो । अब भने आधिकारिक नक्साअनुसार केन्द्रबिन्दु तय गरिने भएपछि यस्तो अन्योल अन्त्य हुने अपेक्षा गरिएको छ ।
केन्द्रविन्दु निर्धारण भएसँगै दायाँ–बायाँ समान दूरी कायम गरी सडकको चौडाइ सुनिश्चित गर्न सहज हुनेछ । यसले सडक विस्तार प्रक्रियालाई थप पारदर्शी, मापदण्डअनुकूल र विवादरहित बनाउने विश्वास गरिएको छ ।
नापजाँच कार्यका लागि आवश्यक प्राविधिक तथा भौतिक सामग्री सडक डिभिजन कार्यालय हेटौँडाले उपलब्ध गराउनेछ भने नक्सा र मापनसम्बन्धी जिम्मेवारी नापी कार्यालय पर्साले लिनेछ । सडक डिभिजन कार्यालय हेटौँडाका इन्जिनियर भोला प्रसाद साहका अनुसार मंगलबार बिहानदेखि औपचारिक रूपमा मापन कार्य सुरु हुनेछ ।
यस कार्यलाई प्रभावकारी बनाउन सडक डिभिजन कार्यालय, नापी कार्यालय, जिल्ला प्रशासन कार्यालय र वीरगंज महानगरपालिकाको संयुक्त कार्यदल समेत गठन गरिएको छ । उक्त टोलीले नापजाँचदेखि कार्यान्वयनसम्म सबै चरणमा समन्वय गरेर काम गर्नेछ ।
यसअघि पनि सडक फराकिलो बनाउने अभियान अन्तर्गत सडक डिभिजन कार्यालयले गत आइतबार गण्डकदेखि भन्सार क्षेत्रसम्मका घर–टहरा डोजर प्रयोग गरी हटाउने कार्य सुरु गरिसकेको छ ।
प्रतिक्रिया दिनुहोस् !