वीरगंज (पर्सा), १० वैशाख । वीरगंजमा मुख्य सडक विस्तार अभियानले तीव्रता पाएसँगै व्यापारिक क्षेत्र गम्भीर रूपमा प्रभावित भएको छ । सडक डिभिजन कार्यालय हेटौंडाले आइतबारदेखि मुख्य सडकको दायाँ–बायाँ २५/२५ मिटरभित्रका संरचना हटाउन थालेपछि ठूलो संख्यामा व्यवसायी विस्थापित भएका छन्, जसको प्रत्यक्ष असर बजार व्यवस्थापनमा देखिएको छ । मेन रोडका सटरहरू हटाइएपछि व्यवसायीहरू वैकल्पिक स्थानको खोजीमा सहायक सडकतर्फ धकेलिएका छन् । तर त्यहाँ पनि सटरको अभाव चुलिँदै गएको छ ।
नयाँ व्यवसाय सुरु गर्न चाहनेहरू मात्र होइन, वर्षौंदेखि व्यापार गर्दै आएका पुराना व्यवसायीहरू समेत सटर नपाउने समस्यामा परेका छन् । उपलब्ध सटरहरूमा समेत अस्वाभाविक रूपमा भाडा बढाइएको व्यवसायीहरूको गुनासो छ । घरधनीहरूले यही अवस्थालाई अवसरका रूपमा उपयोग गर्दै मनपरी भाडा वृद्धि गरेको आरोप व्यापारीहरूले लगाएका छन् । यसले साना तथा मझौला व्यवसायीहरूलाई थप आर्थिक दबाबमा पारेको देखिन्छ ।
यसैबीच, वीरगंज महानगरपालिकाले बजारमा देखिएको अव्यवस्था नियन्त्रण गर्न सक्रियता देखाउने संकेत दिएको छ । मेयर राजेशमान सिंहले सडक विस्तारका कारण व्यवसायीहरूलाई परेको असरप्रति महानगर गम्भीर रहेको जनाउँदै यस्तो संवेदनशील समयमा अनुचित रूपमा भाडा बढाउने वा पुराना व्यवसायीलाई हटाएर बढी भाडा दिने नयाँ व्यक्तिलाई सटर उपलब्ध गराउने प्रवृत्ति अस्वीकार्य हुने बताएका छन् ।
महानगरले अब अनुगमनलाई तीव्र बनाउने तयारी गरेको छ । यदि कसैले जबरजस्ती सटर खाली गराएको वा अस्वाभाविक रूपमा भाडा बढाएको पाइएमा कानुनी कारबाही गरिने चेतावनी मेयर सिंहले दिएका छन् । आवश्यक परे जरिवाना, अनुमति खारेजीजस्ता कडा कदम चाल्न पनि पछि नहट्ने उनले स्पष्ट पारे ।
साना तथा मझौला व्यवसायीको संरक्षणमा महानगर प्रतिबद्ध रहेको उल्लेख गर्दै सिंहले बजारलाई सन्तुलित बनाउन, भाडा दरलाई व्यवस्थित गर्न र विस्थापित व्यवसायीलाई सहजीकरण गर्न विशेष कार्ययोजना ल्याइने जानकारी दिए । उनले घरधनीहरूलाई सामाजिक उत्तरदायित्व बुझ्न आग्रह गर्दै अहिलेको समय अत्यधिक नाफा कमाउने होइन, सहकार्य र सहअस्तित्वको भावना अपनाउने समय भएको बताए ।
सडक विस्तारपछि उत्पन्न सटर अभावले वीरगंजको व्यापारिक वातावरण थप जटिल बनेको छ । विस्थापित व्यवसायीहरू नयाँ सटरको खोजीमा भौँतारिन बाध्य छन् भने बजारमा भाडा दर अनियन्त्रित रूपमा उकालो लागेको छ । वीरगंज–९ घण्टाघर क्षेत्रका एक मोबाइल व्यवसायीका अनुसार केही वर्षअघि १० हजार रुपैयाँमा लिइएको सटरको भाडा क्रमशः बढ्दै अहिले ३० हजारभन्दा माथि पुगेको छ । बिजुली, इन्टरनेटलगायतका खर्च जोड्दा मासिक खर्च ३५ हजार नाघ्ने गरेको उनको भनाइ छ । घरधनीले अझै भाडा बढाउने संकेत गरेपछि सानो व्यवसाय धान्न झनै कठिन भएको उनले बताए ।
यस्तै, मुख्य बजार क्षेत्रमा सटर अभाव बढेसँगै सहायक सडकहरूमा समेत चाप बढेको छ । त्यसको असर घरभाडामा पनि देखिएको छ । पहिले ८–१० हजार रुपैयाँमा पाइने कोठा अहिले १५–२० हजार रुपैयाँसम्म पुगेको छ । स्पष्ट मापदण्डको अभावमा घरधनीहरूले मनलाग्दी भाडा निर्धारण गरिरहेको व्यवसायी तथा डेरावालहरूको गुनासो छ ।
प्रतिक्रिया दिनुहोस् !