वीरगंज (पर्सा), १० वैशाख । पर्सा प्रहरीले वीरगंजस्थित मदरसाहरूमा अनुगमन तथा चेकजाँचलाई तीव्र बनाएको छ । पहिलो चरणमा वीरगंज महानगरपालिका–छपकैया क्षेत्रका चार मदरसामा बिर्ता वडा प्रहरी कार्यालयको टोलीले स्थलगत निरीक्षण गरेको हो ।
प्रहरी निरीक्षक बिक्रम सुवेदीको नेतृत्वमा गरिएको अनुगमनका क्रममा मदरसाहरूको प्रशासनिक अवस्था, दर्ता प्रक्रिया तथा सञ्चालनसम्बन्धी कागजातहरू जाँच गरिएको प्रहरीले जनाएको छ । निरीक्षणका क्रममा एक मदरसा दर्ता बिना सञ्चालनमा रहेको भेटिएपछि त्यसलाई कानुनअनुसार यथाशीघ्र दर्ता प्रक्रिया पूरा गर्न निर्देशन दिइएको प्रहरी निरीक्षक सुवेदीले जानकारी दिएका छन् ।
प्रहरीले सबै शैक्षिक संस्थाहरूलाई कानुनी मापदण्डभित्र रहेर सञ्चालन गर्न आग्रह गर्दै आवश्यक कागजातहरू अद्यावधिक राख्न सचेत गराएको छ । साथै, कुनै शंकास्पद गतिविधि देखिएमा तत्काल जानकारी गराउन सम्बन्धित पक्षसँग अनुरोध गरिएको छ ।
प्रतिक्रिया दिनुहोस् !