सिरहा, ९ चैत । सिरहाका सीमा नाकाहरूमा तस्करीको गम्भीर समस्या सार्वजनिक भएको छ । स्रोतका अनुसार नेपाल प्रहरी र सशस्त्र प्रहरीका केही अधिकारीहरूको सेटिङमा सीमा नाकाबाट अवैध कारोबार सञ्चालन भइरहेको छ । विशेष गरी जेनजी आन्दोलनपश्चात नागरिक सरकार बिदा हुन लागेको र नयाँ सरकार गठन नहुँदासम्मको राजनीतिक खाडलको फाइदा उठाउँदै तस्करीको ‘लाइन’ चलाइएको स्रोतले दाबी गरेको छ ।
मधेश प्रदेश प्रहरी कार्यालयका प्रमुख डीआईजी गोविन्द थपलियाले परिचालन गरेका घुमुवा अधिकारीहरू बरिष्ठ सई गोपाल थापा मगर र सई जयलाल यादव सिरहाका नाकाहरूमा खटाएर तस्करी सञ्चालन गरिरहेको स्रोतले जनाएको छ । डीआईजी थपलियाले प्रदेशमा सरुवा भएलगत्तै अतिरिक्त कमाउधन्दा संचालनका लागि थापामगरलाई सङ्गै लगेका थिए । बरिष्ठ सई थापामगरलाई ८ वटै जिल्लामा घुमुवा परिचालन गरिएको छ भने सई जयलाल यादव धनुषा र सिरहामा असुली तथा सेटिङ व्यवस्थापनको जिम्मेवारीमा छन् ।
सिरहाका जिल्ला प्रहरी कार्यालयका एसपी बासुदेव पाठकको निर्देशनमा असई रामचन्द्र यादवसहित ६ जना घुमुवा खटाइएको छ । विशेष रूपमा थापामगरले ८ जिल्लामा असुली र तस्करीको ‘आतंक’ फैलाउँदै एसपीहरूलाई अप्ठेरोमा पारेको स्रोतले जनाएको छ । जयलाल यादवले धनुषा र सिरहाका नाकाहरूमा डीआईजीको नाममा तस्करीको लाइन चलाएर मासिक दररेट उठाउने काम गर्दै आएका छन् ।
उदाहरणका लागि, धनुषाको जटही नाकामा तस्करी गर्ने व्यापारी उमेश साहले मासिक दररेट डीआईजी र एसपीको नाममा जयलाललाई बुझाएका थिए । तर अन्य घुमुवा थापामगरले चैत १ गते सामान समात्दा तनावपूर्ण स्थिति सिर्जना भएको थियो । स्थिति लुकाउन सई टेकबहादुर कार्कीलाई अनावश्यक रूपमा तान्दा एसपी र डीआईजीबीच खटपट समेत भएको छ ।
सिरहाका नाकाहरू तारापट्टि, झाँझपट्टि, हर्कट्टी, कचनारी, गोरगामा, ठाडी, माडर, खिराउना, बरियारपट्टी र कमलापारी बाट तस्करी सञ्चालन भइरहेको पुष्टि भएको छ । बरियारपट्टी नाकाबाट निरमाला, जिबछा, सोपुर, सिता, अमिरती, राकेश, सुरेन्द्र, दान्तावाली लगायतको समूह मासिक दररेट तिरेर तस्करीको लाइन चलाइरहेका छन् । उनीहरूले चीनबाट आयातित स्याउ, मदिरा भारततर्फ तस्करी गर्दै आएका छन् भने भारतबाट किराना, हार्डवेयर र कपडा नेपालतर्फ ल्याउने काम समेत गर्दै आएका छन् । मासिक दररेट १५ हजारदेखि ५० हजार रुपैयाँसम्म उठाइन्छ ।
सशस्त्र प्रहरी बीओपी बरियारपट्टीका इन्स्पेक्टर पशुपति बरालले घुमुवा अर्जुन ठाकुरलाई नाकामा तस्करीको सेटिङ मिलाउन खटाएका छन् । उनी व्यापारीसँग मासिक दररेट उठाएर इन्स्पेक्टरलाई बुझाउने काम गर्दै आएका छन् । ठाकुर स्वयं जिबस साह, निमाल यादव, अमती यादव, रेनु यादव, गीता महतो, सोपुर बुरीया, सीता, दन्तवाली, सुरेन्द्र साह, राकेश यादवसँग मिलेर मासिक दररेट तय गरी तस्करी संचालन गरिरहेका छन् ।
स्रोतका अनुसार, डीआईजी र एसपीको नाममा तस्करी लाइन सञ्चालन हुनुले प्रहरी संस्थामाथि पनि प्रश्नचिन्ह खडा गरेको छ । यसले सीमा सुरक्षा, कानुनी कार्यवाही र व्यापारिक वातावरणमा गम्भीर असर पारिरहेको छ, र तत्काल प्रभावकारी अनुगमन र जिम्मेवारी तय गर्न आवश्यक देखिएको छ ।
प्रतिक्रिया दिनुहोस् !