वीरगंज (पर्सा), ८ चैत । पर्साको पकहाँ मैनपुर गाउँपालिका–३ का ५१ वर्षीय शिक्षक चन्देश कुमार चौहान नक्कली प्रमाणपत्र आरोपबाट मुक्त भएका छन् । अख्तियार दुरुपयोग अनुसन्धान आयोगले दायर गरेको मुद्दामा आइतबार सुनुवाइ गर्दै विशेष अदालतका न्यायाधीश नारायणप्रसाद पौडेल र विदुर कोइरालाको संयुक्त इजलासले चौहानलाई पूर्ण रूपमा सफाइ दिएको हो ।
अख्तियारले जेठ २६ गते दर्ता गरेको मुद्दामा चौहानमाथि उनको शैक्षिक योग्यताको प्रमाणपत्र नक्कली रहेको आरोप लगाइएको थियो । तर सुनुवाइका क्रममा अदालतले प्रस्तुत प्रमाण पर्याप्त नदेखिएको ठहर गर्दै उनलाई आरोपित कसुरबाट मुक्त गर्ने फैसला सुनाएको हो । चौहान वीरगंज–१ छपकैयास्थित श्री पंडित रामदेनि तिवारी आधारभूत विद्यालयका प्रधानाध्यापक हुन् । अख्तियारले भ्रष्टाचार निवारण ऐन, २०५९ को दफा १६ (१) बमोजिम उनलाई कैद र जरिवाना माग गर्दै आरोपपत्र दायर गरेको थियो, तर अदालतले कसुर प्रमाणित हुन नसकेको निर्णय गर्यो ।
अदालतले उक्त फैसलाको जानकारी शिक्षा विकास तथा समन्वय इकाई, वीरगंज महानगरपालिकाको शिक्षा महाशाखा र सम्बन्धित विद्यालयसमेतलाई गराइसकेको जनाएको छ ।
प्रतिक्रिया दिनुहोस् !