वीरगंज (पर्सा), ८ चैत । वीरगंजस्थित हरिखेतान बहुमुखी क्याम्पसमा देखिएको व्यवस्थापन–शिक्षक विवाद अन्ततः विद्यार्थी आक्रोशमा विस्फोट हुँदा आइतबार दिनभर शहर तनावग्रस्त बनेको छ । कक्षा ११ र १२ को परीक्षा दिन पुगेका विद्यार्थीलाई क्याम्पसको मूल गेटमै रोकेपछि स्थिति नियन्त्रण बाहिर गएको हो । क्याम्पस प्रशासनले आइतबारदेखि परीक्षा सञ्चालन गर्ने तालिका सार्वजनिक गरेपनि आन्दोलनरत शिक्षकका कारण परीक्षा स्थगित गरिएको भन्दै विद्यार्थीलाई प्रवेश निषेध गरिएको थियो ।
यसबाट आक्रोशित विद्यार्थीहरू गेटअगाडि प्रदर्शनमा उत्रिए । अवस्था चर्किँदै जाँदा प्रहरीले लाठीचार्ज गर्नुका साथै तीन जना विद्यार्थीलाई नियन्त्रणमा लिएको थियो । लाठीचार्जमा एक विद्यार्थी घाइते भएपछि आन्दोलन झन् उग्र बनेको थियो । आक्रोशित विद्यार्थीहरूले क्याम्पस अगाडिबाट नाराबाजी गर्दै घण्टाघर चोकसम्म प्रदर्शन गरे । त्यहाँ उनीहरूले सडक अवरुद्ध गर्दै धर्ना दिए, टायर बालेर विरोध जनाए र चक्काजामसमेत गरे । आन्दोलनका क्रममा प्रहरीसँग घम्साघम्सी हुनुका साथै केही भौतिक क्षतिसमेत भएको छ । प्रदर्शनकारीले क्याम्पसको बसमा तोडफोड गर्नुका साथै सडक किनारमा रोपिएका बिरुवाहरू समेत नष्ट गरेका थिए ।
प्रदर्शनमा सहभागी विद्यार्थीहरूका अनुसार विगत एक वर्षदेखि क्याम्पस व्यवस्थापन र शिक्षकबीचको विवादका कारण नियमित पठनपाठन र आन्तरिक परीक्षा प्रभावित हुँदै आएको छ । कक्षा १२ का एक विद्यार्थीले शिक्षकहरूले आन्दोलनका नाममा पढाइसमेत प्रभावित बनाएको र परीक्षा दिनबाट समेत वञ्चित गरिएपछि बाध्य भएर सडकमा उत्रिनुपरेको बताए । उनीहरूले क्याम्पस प्रमुख र सञ्चालक समितिको राजीनामा माग्दै आन्दोलन नरोकिने चेतावनी दिएका थिए । विद्यार्थीहरूको आन्दोलनलाई अन्य क्याम्पसका विद्यार्थी नेताहरूले पनि समर्थन जनाएका थिए । उनीहरूले सामुदायिक क्याम्पसलाई निजी स्वार्थका लागि प्रयोग गरिएको आरोप लगाउँदै व्यवस्थापन–शिक्षक द्वन्द्वले विद्यार्थीको भविष्य नै संकटमा परेको बताएका छन् ।
यता क्याम्पस व्यवस्थापन पक्षले भने शिक्षकहरूले अनुचित माग राख्दै विद्यार्थीलाई उक्साएर शैक्षिक वातावरण बिगारेको आरोप लगाएको छ । आन्दोलनका कारण समस्या समाधान गर्न कठिन भएको उनीहरूको भनाइ छ । क्याम्पस प्रमुख भने सम्पर्कमा आउन चाहेनन् । स्थिति झन् जटिल बन्दै गएपछि प्रशासनले हस्तक्षेप गरेको थियो । जिल्ला प्रशासन कार्यालय पर्सामा प्रमुख जिल्ला अधिकारी भोला दाहालको उपस्थितिमा सरोकारवालाहरूबीच छलफल भएपछि तीन बुँदे सहमति कायम गरिएको छ ।
सहमति अनुसार स्थगित परीक्षा र पठनपाठन तत्काल सञ्चालन गरिने, आन्दोलनका क्रममा घाइते भएका विद्यार्थीहरूको उपचारको व्यवस्था क्याम्पस प्रशासनले गर्ने, तथा बाँकी माग र समस्या समाधानका लागि पुनः बैठक बस्ने निर्णय गरिएको छ । यस सहमतिपछि साँझदेखि विद्यार्थीको आन्दोलन स्थगित भएको छ । लामो समयदेखिको आन्तरिक विवादका कारण सिर्जित शैक्षिक संकट तत्काल समाधान नहुँदासम्म यस्ता घटना पुनः दोहोरिन सक्ने चिन्ता भने यथावत् रहेको छ । 
प्रतिक्रिया दिनुहोस् !