वीरगंज (पर्सा), ८ चैत । पर्सा सहित तराईका जिल्लाहरुमा आइतबारदेखि आस्था र श्रद्धाको महान पर्व चैती छठ विधिवत् रूपमा सुरु भएको छ । चार दिनसम्म विभिन्न धार्मिक विधि अपनाउँदै मनाइने यो पर्व तराईका पर्सा, बारा, रौतहट, सर्लाही, सिरहा, महोत्तरी, धनुषा, सप्तरी, सुनसरी, मोरङ लगायत जिल्लाभरि परम्परागत रूपमा मनाउन थालिएको हो ।
पर्सा जिल्लाको घडिअर्वा पोखरी, नगवा पोखरी, रानीघाट स्थित तालतलैया लगायत बारा कलैया, रौतहटको गौर, सर्लाहीको मलङ्गगवा, महोत्तरीका जलेश्वर, मटिहानी, गौशाला, पिपरा, सम्सी, बर्दिबास क्षेत्रका पोखरी, तलाउ तथा बिग्ही, रातो मरहा, जङ्गहा, अंकुसीजस्ता नदी र नहरका किनारमा श्रद्धालुहरूको चहलपहल बढेको छ । यी स्थानहरूमा भक्तजनहरूले विधिपूर्वक पूजा–आराधना गर्दै पर्व मनाउने परम्परा रहिआएको छ ।
जलेश्वर नगरपालिका–१ स्थित बाबा जलेश्वरनाथ महादेव मन्दिरका पुजारी कामेश्वर पाठकका अनुसार छठ पर्वले सत्य, अहिंसा र सबै जीवप्रति करुणा जागृत गराउने सन्देश दिन्छ । सूर्य उपासनाको विशेष परम्पराका रूपमा चिनिने यस पर्वमा अस्ताउँदो र उदाउँदो सूर्य दुवैको पूजा गरिने अनौठो विशेषता रहेको उनी बताउँछन् । पारिवारिक सुख–शान्ति, समृद्धि, स्वास्थ्य लाभ तथा मनोकामना पूरा होस् भन्ने कामनासहित श्रद्धालुहरूले छठ पर्व मनाउने गर्छन् । यस दिन नदी, तलाउ र जलाशयहरूमा भक्तजनको भीड लाग्ने गरेको छ ।
चार दिनसम्म चल्ने यस पर्वको पहिलो दिन ‘नहा–खा’ को रूपमा मनाइन्छ, जसमा व्रतालुहरूले स्नान गरी शुद्ध भोजन ग्रहण गर्छन् । दोस्रो दिन सोमबार ‘खर्ना’ मनाइन्छ, जसमा दिनभर उपवास बसेपछि राति छठ देवतालाई आमन्त्रण गर्दै कूलदेवताको पूजा गरिन्छ र नुनबिनाको भोजन गरिन्छ ।
तेस्रो दिन अर्थात् षष्ठीका साँझ विशेष पूजा गरिन्छ । यस दिन गहुँ र चामलको पीठोबाट ठेकुवा, भुसुवा, खजुरिया, पेरुकियाजस्ता परिकार तयार पारिन्छन् । साथै विभिन्न फलफूल, मूला, गाजर, बेसार, नरिवल, केरा लगायत सामग्री डालीमा सजाएर भक्तजनहरू भक्ति गीत गाउँदै छठ घाटसम्म पुग्छन् । त्यहाँ पानीमा उभिएर अस्ताउँदो सूर्यलाई अर्घ अर्पण गरिन्छ ।
अन्तिम दिन बिहान सबेरै पुनः घाटमा पुगेर उदाउँदो सूर्यलाई अर्घ दिँदै छठ पर्व समापन गरिन्छ । धार्मिक विश्वासअनुसार, महाभारत कालमा द्रौपदी र पाण्डवहरूले अज्ञातवास सफल होस् भनी सूर्यदेवको आराधना गरेपछि छठ पर्वको सुरुआत भएको मानिन्छ । धार्मिक आस्थासँगै सामाजिक सद्भावको प्रतीक बनेको यस पर्व हिन्दू मात्र नभई मुस्लिम समुदायले पनि मिलेर मनाउने परम्परा छ । छठमा चढाइने सामग्रीको संख्या ७० पुर्याउनुपर्ने विश्वास रहेपनि सामर्थ्य नभएकाहरूले सामान्य अर्पण गरे पनि सूर्यदेव प्रसन्न हुने जनविश्वास कायम छ ।
प्रतिक्रिया दिनुहोस् !