वीरगंज (पर्सा), ८ चैत । पर्साको जगरनाथपुर गाउँपालिकाले माध्यमिक शिक्षा परीक्षा (एसईई)को तयारीमा रहेका विद्यार्थीहरूलाई प्रोत्साहनस्वरूप विभिन्न शैक्षिक सामग्री वितरण गरेको छ । आइतबार गाउँपालिका–४ स्थित सण्ठीको एक विद्यालयमा आयोजित विदाई कार्यक्रममा गाउँपालिका शिक्षा शाखाको पहलमा पालिकाभित्रका तीन वटा माध्यमिक विद्यालयबाट एसईई दिन लागेका करिब १ सय २० जना विद्यार्थीलाई टी–सर्ट, डायरी र कलम प्रदान गरिएको हो ।
कार्यक्रममा गाउँपालिका अध्यक्ष श्रीकान्त प्रसाद यादवले पालिकाको लोगो अंकित टी–सर्टसहित अन्य सामग्री विद्यार्थीहरूलाई हस्तान्तरण गर्दै आगामी चैत १९ गतेदेखि सुरु हुने एसईई परीक्षाका लागि शुभकामना व्यक्त गरे । उनले परीक्षापछि उच्च शिक्षाका क्रममा कुनै समस्या आएमा आफू वा प्रमुख प्रशासकीय अधिकृतसँग सिधै सम्पर्क गर्न आग्रह गर्दै आवश्यक सहयोग गर्ने प्रतिबद्धता समेत जनाए ।
विदाई समारोहमा अध्यक्ष यादवसँगै उपाध्यक्ष बबीता सिंह क्षेत्री, प्रमुख प्रशासकीय अधिकृत सन्देश कुमार यादवलगायतले विद्यार्थीहरूलाई खादा ओढाएर सम्मानपूर्वक विदाई गरेका थिए । गाउँपालिकाका शिक्षा शाखा प्रमुख अशोक कुमार सिंहका अनुसार कार्यक्रममा शिक्षा समितिका सदस्य, वडा प्रतिनिधि, विद्यालयका प्रधानाध्यापक, शिक्षक–शिक्षिका तथा अभिभावकहरूको उल्लेखनीय उपस्थिति रहेको थियो ।
गाउँपालिकाको यस पहलले परीक्षामा सहभागी हुन लागेका विद्यार्थीहरूमा उत्साह थपिएको सहभागीहरूले बताएका छन् ।
प्रतिक्रिया दिनुहोस् !