महोत्तरी, ७ चैत । महोत्तरीको रामनगरस्थित एभरेष्ट चिनी मिलले विविध चुनौतीका बाबजुद यस वर्षको उखु क्रसिङ सफलतापूर्वक सम्पन्न गरेको छ । गत पुस ७ गते सञ्चालनमा आएको मिलले चैत ६ गते राति २ बजेदेखि चालुको क्रसिङ औपचारिक रूपमा बन्द गरेको छ ।
यस वर्ष मिलले न्यूनतम ३१ लाख क्विन्टल उखु क्रसिङ गरी करिब दुई लाख ७९ हजार क्विन्टल चिनी उत्पादन गर्ने लक्ष्य राखेको थियो । तर उखु अभावका कारण २८ लाख ५३ हजार १७८ क्विन्टल मात्र क्रसिङ गर्न सकियो, जुन लक्ष्यभन्दा करिब २ लाख क्विन्टल कम हो ।
उद्योगका वित्तीय महाप्रबन्धक विमलचन्द्र ठाकुरका अनुसार किसान आन्दोलन, मौसमी प्रतिकूलता, चुनावी व्यस्तता र उखु अभाव जस्ता समस्याले उत्पादनमा असर पारेको छ । आर्थिक वर्ष २०८१/८२ को सत्रमा मिल ९२ दिन सञ्चालन भएको थियो भने यस वर्ष उखु अभावका कारण ८९ दिन मात्रै सञ्चालन हुन सकेको मिल व्यवस्थापन पक्षले जनाएको छ ।
निर्वाचन, सरसफाइ र उखु अभावका कारण क्रसिङ पटक–पटक प्रभावित भएको पनि ठाकुरले बताए । मिलले यस सिजनमा खरिद गरिएका उखुमध्ये फागुन २६ गतेसम्म २६ लाख ३२ हजार क्विन्टल उखुको एक अर्ब ६१ करोड ७२ लाखभन्दा बढी रकम एकहजार १७४ जना किसानको खातामा भुक्तानी गरिएको र बाँकी रकम पनि एक साताभित्र भुक्तानी गरिने वित्तीय महाप्रबन्धक ठाकुरले जानकारी दिएका छन् ।
प्रतिक्रिया दिनुहोस् !