वीरगंज (पर्सा), ७ चैत । विद्यालय भवनको अभाव र जीर्ण अवस्थालाई मध्यनजर गर्दै अमेरिकी आइएनजिओ ‘विल्डअन’ नेपालले मधेश प्रदेशमा ४० वटा आधारभूत विद्यालय भवन निर्माण गर्ने योजना अघि बढाएको छ । सन् २०२६ भित्र लक्ष्य पूरा गर्नेगरी काम सुरु गरिएको हो ।
यसै विच सिरहामा भएको त्रिपक्षीय सम्झौता अनुसार भवन निर्माण सुरु भएको छ । ‘विल्डअन’ नेपाल, लहान नगरपालिका र स्थानीय समुदायबीच त्रिपक्षीय सम्झौता भएअनुसार लहान–२ को भानु आधारभूत विद्यालय, लहान–१ को सिंगराही मटियर्वा विद्यालय र लहान–४ को मधेश सहिद विजय सहनी आधारभूत विद्यालयमा भवन तथा शौचालय निर्माणको शुक्रवार र शनिवार शिलान्यास गरिएको छ ।
सम्झौता अनुसार निर्माणमा संस्थाले करिब ३३ लाख रुपैयाँ र नगरपालिकाले १५ लाख रुपैयाँ योगदान गर्नेछ भने स्थानीय समुदायको श्रमदान अनिवार्य गरिएको छ । निर्माण संस्था विल्डन नेपालका अनुसार सिरहामा २० वटा सहित समग्र मधेस प्रदेशमा ४० वटा विद्यालय भवन निर्माण गर्ने लक्ष्य छ ।
प्रत्येक भवन सम्झौता भएको तीन महिना १६ दिनभित्र निर्माण सम्पन्न गरिसक्ने योजना रहेको जनाइएको छ । ‘विल्डअन’ले विकासोन्मुख देशहरूमा विद्यालय पूर्वाधार निर्माण गर्दै आएको छ ।
प्रतिक्रिया दिनुहोस् !