वीरगंज (पर्सा), ७ चैत । पर्सा जिल्लामा वितेको धानबाली उत्पादनमा विगतका बर्षहरूभन्दा गिरावट आएको देखिएको छ । कृषि ज्ञान केन्द्र पर्साका अनुसार वितेका वर्षको तुलनामा यस वर्ष पर्सामा २४ हजार ९ सय ९७ मेट्रिक टन कम धान उत्पादन भएको छ ।
यो वर्ष वितेको पुस महिनासम्मको हिसाव गर्दा जिल्लाभर ४७ हजार १ सय ३० हेक्टर क्षेत्रफलमा धान खेती गरिएकोमा प्रतिहेक्टर ३ दशमलव ६७ मेट्रिक टनको दरले कूल १ लाख ७२ हजार ९ सय ६७ मेट्रिक टन धान उत्पादन भएको छ ।
अघिल्लो वर्ष जिल्लामा सोही क्षेत्रफलमा धान खेती गरिएकोमा प्रति हेक्टर ४ दशमलव २ मेट्रिक टन उत्पादन भएको थियो । सो आधारमा १ लाख ९७ हजार ९ सय ४० मेट्रिक टन धान उत्पादन भएको थियो ।
यसरी यस वर्ष धानको उत्पादन १२ दशमलव १६ प्रतिशतले घट्नु चिन्ताको विषय भएको कृषि विज्ञहरूले बताएका छन् । अव फेरी धान खेती लगाउने समय सुरु भइसेको छ । वितेको धानबालीमा के के कमि कमजोरी भएको थियो सो बारे निश्कर्षमा पुगेर समाधानका उपायहरू अपनाउन नसके लगातार उत्पादन घटने समस्या आउन सक्ने भन्दै पर्सेली किसानले चिन्ता जाहेर गरेका छन् ।
यस सम्बन्धमा कृषि ज्ञान केन्द्र पर्साका प्रमुख रामजीवन ठाकुरले भने वितेको धानबालीको समयमा बेमौसमी वर्षा र त्यससँगै आएको बाढीले धान बालीमा गम्भीर क्षति पुर्याएको र त्यस अघि रोपनीको बेला खडेरी परेकोले धानको उत्पादनमा असर परेको बताएका छन् ।
प्रतिक्रिया दिनुहोस् !