पचगावाँ स्कुलमा वित्तीय साक्षरता कार्यक्रम, विद्यार्थीहरूको उत्साहजनक सहभागिता

वीरगंज (पर्सा), ६ चैत । पर्साको सखुवा प्रसौनी गाउँपालिका–२ स्थित दिपनारायण आदर्श माध्यमिक विद्यालय पचगावाँमा शुक्रबार वित्तीय साक्षरता सम्बन्धी कार्यक्रम सफलतापूर्वक सम्पन्न भएको छ । ‘ग्लोबल मनी विक’को अवसर पारेर कृषि विकास बैंक शाखा कार्यालय सखुवा प्रसौनीले उक्त कार्यक्रम आयोजना गरेको हो । कार्यक्रम अन्तर्गत वित्तीय चेतनामूलक सन्देश लेखिएका प्लेकार्ड बोकेर निकालिएको प्रभातफेरीले पचगावाँ, औराहा र श्रीपुर बजारको परिक्रमा गरेको थियो ।

त्यसपछि कृषि विकास बैंकको शाखा कार्यालयमा पुगेर कार्यक्रम कोणसभामा रूपान्तरण गरिएको थियो । कोणसभालाई सम्बोधन गर्दै कृषि विकास बैंक मधेस प्रदेश क्षेत्रीय कार्यालयका निर्देशक अर्जुन ढुंगानाले पैसाको सुरक्षित व्यवस्थापन र सही उपयोगको आवश्यकता औँल्याए । उनले बैंकलाई केवल पैसा राख्ने स्थान मात्र नभई उत्पादनशील क्षेत्रमा लगानी गर्ने माध्यमको रूपमा लिनुपर्ने धारणा व्यक्त गरे । ग्रामीण क्षेत्रमा बैंकिङ पहुँच विस्तार भएसँगै सेवाग्राहीको सहभागिता बढ्दै गएको उल्लेख गर्दै उनले ‘स्मार्ट मनी टल्क्स’को भावनाअनुसार सबैले वित्तीय अनुशासन अपनाउनुपर्ने बताए ।

त्यसैगरी, क्षेत्रीय शाखा प्रमुख विजय गौतमले सक्कली र नक्कली नोट छुट्याउने तरिकाबारे सहभागीलाई जानकारी गराए । कार्यक्रममा विद्यालयका प्रधानाध्यापक शिवनाथ प्रसाद थारु तथा नेपाल पत्रकार महासंघ पर्साका सदस्य प्रमोद यादवले पनि वित्तीय साक्षरताको महत्वमाथि आफ्ना विचार राखेका थिए । कार्यक्रममा कक्षा ११ र १२ का विद्यार्थीका साथै सूचना प्रविधि विषय अध्ययनरत विद्यार्थीहरूको उल्लेखनीय उपस्थिति रहेको थियो ।

शाखा प्रबन्धक त्रिबेदी कुमार शाहको अध्यक्षतामा सम्पन्न कार्यक्रममा बैंकका कर्मचारीहरू अभिनाष ठाकुर, सोनि प्रीया महर्जन, किशोरलाल बछार र रामनिवास साह कानु लगायतको सक्रिय सहभागिता रहेको थियो ।