वीरगंज (पर्सा), ५ चैत । जिल्ला प्रशासन कार्यालय ले फागुन ५ गतेदेखि हालसम्म आमाको नामबाट ३३ जनालाई नागरिकता प्रदान गरेको जनाएको छ । नेपाल नागरिकता ऐन, २०६३ र नेपाल नागरिकता (चौथो संशोधन) नियमावली, २०८२ मन्त्रिपरिषद्बाट स्वीकृत भई राजपत्रमा प्रकाशित भएपछि बुबाको पहिचान नखुलेका नागरिकलाई आमाको नामबाट नागरिकता दिने व्यवस्था कार्यान्वयनमा आएको हो । कार्यालयका अनुसार आवश्यक मापदण्ड र कागजात पूरा गरेका नागरिकताविहीन व्यक्तिहरूलाई उक्त प्रावधानअनुसार नागरिकता वितरण थालिएको हो ।
फागुन ५ गतेदेखि प्रक्रिया सुरु भएसँगै योग्य नागरिकहरूले आमाको नामबाट नागरिकता पाउन थालेका छन् । वीरगंज महानगरपालिका–११ का विजयकुमार साहले आमाको नामबाट नागरिकता पाएपछि आफूलाई ठूलो राहत मिलेको बताए । ‘धेरै वर्षसम्म नागरिकता बनाउन धाउनुपर्यो, अब भने विभिन्न प्रशासनिक झन्झटबाट मुक्ति पाएको महसुस भएको छ,’ उनले प्रतिक्रिया दिए ।
त्यस्तै वीरगंज महानगरपालिका–१३ का जुबैर अन्सारीले लामो संघर्षपछि नागरिकता प्राप्त गर्न सफल हुँदा ठूलो उपलब्धि हासिल गरेको अनुभूति भएको बताए । ‘नागरिकताविहीन हुनु निकै पीडादायी रहेछ, तर आमाको नामबाट नागरिकता पाएपछि अहिले अत्यन्त खुसी लागेको छ,’ उनले भने । पर्साका सहायक प्रमुख जिल्ला अधिकारी सुमनकुमार कार्कीले नियमावली कार्यान्वयनमा आएपछि तोकिएका मापदण्ड पूरा गर्ने नागरिकलाई नागरिकता प्रदान गर्न थालिएको जानकारी दिए । उनले नागरिकताविहीन भएर अधिकारबाट वञ्चित भएका व्यक्तिहरूका लागि यो व्यवस्था ठूलो राहत भएको उल्लेख गरे ।
नयाँ प्रावधान लागू भएसँगै लामो समयदेखि नागरिकता नपाएर समस्यामा परेका नागरिकहरूलाई कानुनी पहिचान दिलाउने प्रक्रिया प्रभावकारी रूपमा अघि बढ्न थालेको छ ।
प्रतिक्रिया दिनुहोस् !