वीरगंज (पर्सा), १४ साउन । वीरगंज महानगरपालिकाका नगरप्रमुख राजेशमान सिंहले नारायणी रङ्गशाला पुनः निर्माणका लागि बजेटको माग गरेका छन् । लामो समयदेखि जीणर् रहेको नारायणी रङ्गशाला पुनःनिर्माणका लागि नगरप्रमुख सिंहले युवा तथा खेलकुद मन्त्री डिगबहादुर लिम्बुसँग बजेट माग गरेका हुन् । सिंहले आफ्नै कार्यकक्षमा नेपाल सरकारका युवा तथा खेलकुद मन्त्री डिगबहादुर लिम्बुलाई स्वागत गर्दै रङ्गशाला पुनःनिर्माण अत्यावश्यक रहेकोले बजेटको व्यवस्थापन गरिदिन आग्रह गरेका थिए ।
उनले यो रङ्गशाला पुनःनिर्माणले यस क्षेत्रका युवा तथा खेलप्रेमीका लागि उत्साह थप्नुका साथै खेलकुद गतिविधिमा पनि बृद्धि हुने विश्वास व्यक्त गर्दै रङ्गशाला पुनःनिर्माणका लागि सरकारको सहयोगको आवश्यकता रहेको बताएका थिए । स्थानीय सरकार एक्लै चाहेर मात्रै सम्भव नरहेकाले त्यसका लागि संघ सरकारको सहयोग आवश्यक रहेकोले देशकै धरोहरको रुपमा रहेको नारायणी रङ्गशालालाई पुनः निर्माणको लागि पहल गरिदिन मन्त्री लिम्बुलाई आग्रह गरेका थिए ।
सोही क्रममा मन्त्री लिम्बुले युवा तथा खेलकुदका लागि सरकारले लगानी गरिरहेको अवस्थामा जीणर् अवस्थामा रहेको नारायणी रंगशाला पुनः निर्माणमा आफ्नो चासो रहने प्रतिबद्धता जनाएका थिए । उनले रङ्गशाला पुनः निर्माणका लागि संघ, प्रदेश र स्थानीय तीन वटै सरकारको समन्वयमा काम गर्न आफू तयार रहेको बताएका थिए । यो रंगशाला संघ सरकार मातहत रहेकाले संघले यसमा लगानी गर्न सँधै तयार रहेको भन्दै आवश्यक योजना बनाएर आउन मन्त्री लिम्बुले आग्रह गरे ।
प्रतिक्रिया दिनुहोस् !