वीरगंज (पर्सा), ६ मंसिर । पटेर्वा सुगौली गाउँपालिकामा आयोजित माध्यमिक विद्यालयस्तरीय छात्रामैत्री भलिबल प्रतियोगिताको उपाधि श्री नेपाल राष्ट्रिय माध्यमिक विद्यालय, निचुटाले हात पारेको छ । शनिबार सम्पन्न फाइनल खेलमा निचुटा माविले श्री नेपाल राष्ट्रिय माध्यमिक विद्यालय, रंगपुरलाई लगातार दुई सेटमा पराजित गर्दै च्याम्पियन बन्न सफल भएको हो । प्रतिस्पर्धात्मक फाइनलमा रंगपुर माविलाई २–० को सोझो सेटमा हराउँदै निचुटाले आफ्नो उत्कृष्ट खेल प्रदर्शन गरेको थियो ।
दिव्य विकास स्रोत केन्द्र, पर्सा र एक्सनएड नेपालको संयुक्त साझेदारी तथा पटेर्वा सुगौली गाउँपालिकाको सहकार्यमा सञ्चालित स्थानीय अधिकार कार्यक्रमअन्तर्गत प्रतियोगिता आयोजना गरिएको थियो । प्रतियोगिताको समापन तथा पुरस्कार वितरण समारोह दिव्य विकास स्रोत केन्द्रका कार्यकारी निर्देशक रामाकान्त प्रसाद कुर्मीको अध्यक्षतामा सम्पन्न भयो । कार्यक्रममा गाउँपालिका अध्यक्ष दिनेश कुमार चौधरी प्रमुख अतिथि र उपाध्यक्ष ममता महतो विशिष्ट अतिथिका रूपमा सहभागी थिए ।
समारोहमा गाउँपालिका कार्यपालिका सदस्य साजिना विक रसैली, दिव्य विकास स्रोत केन्द्रकी कार्यक्रम संयोजक रीना चौधरी, वित्त तथा प्रशासन संयोजक श्यामकिशोर प्रसाद चौहानसहित विभिन्न विद्यालयका प्रधानाध्यापक, शिक्षक तथा प्रतिनिधिहरूको उपस्थिति रहेको थियो । उपाधि विजेता निचुटा मावि र उपविजेता रंगपुर माविका खेलाडीहरूलाई गाउँपालिका अध्यक्ष चौधरी, उपाध्यक्ष महतो तथा केन्द्रका कार्यकारी निर्देशक कुर्मीले मेडल, ट्रफी र मायाको चिनो प्रदान गरी सम्मान गरेका थिए ।
प्रतियोगिता आयोजना गर्नुको मुख्य उद्देश्य छात्राहरूमा खेलकुदप्रतिको आकर्षण बढाउनुका साथै उनीहरूको अन्तर्निहित प्रतिभा र क्षमता उजागर गर्नु रहेको आयोजकले जनाएको छ । खेलकुदमार्फत किशोरीहरूमा आत्मविश्वास, नेतृत्वदक्षता, अनुशासन, सहकार्य र प्रतिस्पर्धात्मक क्षमताको विकास गर्ने लक्ष्यसमेत राखिएको थियो । विद्यालयस्तरमा छात्राहरूको खेल सहभागिता विस्तार गर्दै लैङ्गिक समानता कायम गर्न र उनीहरूका लागि अनुकूल शैक्षिक तथा खेलकुद वातावरण निर्माण गर्न प्रतियोगिताले योगदान पुर्याउने अपेक्षा गरिएको छ ।
दिव्य विकास स्रोत केन्द्र, पर्साले स्थानीय अधिकार कार्यक्रममार्फत बालबालिका तथा किशोरीहरूको अधिकार संरक्षण, सशक्तीकरण, समावेशी शिक्षा र लैङ्गिक समानताको क्षेत्रमा विभिन्न कार्यक्रम सञ्चालन गर्दै आएको छ ।



























प्रतिक्रिया दिनुहोस् !