वीरगंज (पर्सा), २ मंसिर । पर्सामा अपराधका घटना, आर्थिक अनियमितता, लागूऔषध कारोबार र अवैध गतिविधि नियन्त्रण प्रहरीका लागि चुनौती बन्दै गएको देखिएको छ । जिल्ला प्रहरी कार्यालय पर्साको कात्तिक महिनाको तथ्यांकले एक महिनामै जिल्लाभर विभिन्न प्रकृतिका ११८ वटा अपराधका घटना दर्ता भएको देखाएको छ । यस अवधिमा चालु मुद्दाका फरार तथा प्रतिवादी गरी १२२ जनालाई प्रहरीले पक्राउ गरेको छ ।
जिल्ला प्रहरी कार्यालय पर्साले सार्वजनिक गरेको कात्तिक महिनाको कार्यप्रगति विवरणअनुसार सबैभन्दा बढी आर्थिक अपराधका ४९ वटा घटना दर्ता भएका छन् । संगठित तथा सामाजिक अपराधका २२, अन्य प्रकृतिका १४, ज्यानसम्बन्धी ११, आत्महत्यासम्बन्धी आठ, चोरीका आठ, बालबालिकासम्बन्धी चार र सवारी ज्यानसम्बन्धी दुई घटना अभिलेख भएका छन् ।
प्रहरी उपरीक्षक (एसपी) पवनकुमार भट्टराईका अनुसार अदालतबाट फैसला भई कार्यान्वयन हुन बाँकी रहेका मुद्दाका ८५ जना प्रतिवादी पनि पक्राउ परेका छन् । उनीहरूबाट २५ वर्ष १० महिना तीन दिन कैद र ३२ लाख सात हजार ६३२ रुपैयाँ जरिवाना असुल गर्नुपर्ने रहेको छ ।
कात्तिक महिनामा कर्तव्य ज्यान र हातहतियारसम्बन्धी एक–एकवटा मुद्दा दर्ता भएका छन् । आर्थिक अपराधतर्फ बैंकिङ कसुरका १४, ठगीका दुई र मुद्रासम्बन्धी दुई घटना भएका छन् । यसले जिल्लामा आर्थिक अपराधको दबदबा बढिरहेको संकेत गरेको छ ।
लागूऔषध कारोबारमा १७ जना पक्राउ
सीमावर्ती जिल्ला पर्सामा लागूऔषध कारोबार नियन्त्रण पनि प्रहरीको प्रमुख चुनौतीका रूपमा देखिएको छ । कात्तिक महिनामा लागूऔषधसम्बन्धी १४ वटा मुद्दा दर्ता गरी १७ जनालाई पक्राउ गरिएको प्रहरीले जनाएको छ ।
प्रहरीले उनीहरूको साथबाट ३८ ग्राम गाँजा, ६५ ग्राम ८५८ मिलिग्राम ब्राउन सुगर र १४ ग्राम ६४० मिलिग्राम चरेस बरामद गरेको छ । त्यसैगरी नाइट्राजेपाम ट्याब्लेट, बुप्रेनोर्फिनका २८, डाइजेपामका ३७ र प्रोमेथाजिन हाइड्रोक्लोराइडका १९ एम्पुल पनि बरामद भएका छन् ।
लागूऔषधको दुरुपयोग रोक्न प्रहरीले सचेतनामूलक अभियानसमेत सञ्चालन गरेको छ । एक महिनामा ३१ वटा कार्यक्रममार्फत ५१४ जनालाई लागूऔषधको असर र जोखिमबारे जानकारी गराइएको प्रहरीको भनाइ छ ।
भन्सार छलीका ७० लाखभन्दा बढीका सामान बरामद
अवैध आयात, भन्सार छली र राजस्व चुहावट नियन्त्रण अभियानका क्रममा प्रहरीले कात्तिक महिनामा ७० लाख ७० हजार ७९६ रुपैयाँ बराबरका सामान बरामद गरेको छ । अवैध मदिरा कारोबारविरुद्धको कारबाहीमा ६ हजार २६३ लिटर तयारी मदिरा र ६ हजार ३८० लिटर कच्चा पदार्थ नियन्त्रणमा लिइएको छ । उक्त कारोबारमा संलग्न रहेको आरोपमा ११ जना पक्राउ परेका छन् ।
प्राकृतिक स्रोतको अवैध दोहन नियन्त्रण गर्ने क्रममा बालुवा, ढुंगा र गिट्टी ओसारपसारमा प्रयोग गरिएका १० वटा ट्याक्टर नियन्त्रणमा लिई ५० हजार रुपैयाँ जरिवाना गरिएको छ । त्यस्तै, अवैध वन पैदावार ओसारपसारमा संलग्न १० वटा सवारीसाधन नियन्त्रणमा लिएर ३९ क्युबिक फिट काठ बरामद गरिएको छ । यसबाट एक लाख ९५ हजार रुपैयाँ राजस्व तथा जरिवाना प्राप्त भएको प्रहरीले जनाएको छ ।
३७ दुर्घटना, दुई जनाको मृत्यु
अपराध नियन्त्रणसँगै सडक सुरक्षाको अवस्था पनि चिन्ताजनक देखिएको छ । कात्तिक महिनामा पर्सामा ३७ वटा सवारी दुर्घटना हुँदा दुई जनाको मृत्यु भएको छ भने २८ जना घाइते भएका छन् । दुर्घटनामा ६० वटा सवारीसाधन संलग्न थिए ।
प्रहरीको विश्लेषणअनुसार ११ वटा दुर्घटना चालकको कारण, २१ वटा सवारीसाधनको अवस्थाका कारण र पाँचवटा यात्रुको कारण भएका हुन् । ट्राफिक नियम उल्लंघन गर्ने ९४१ वटा सवारीसाधनलाई कारबाही गरी प्रहरीले १० लाख ८७ हजार ५०० रुपैयाँ राजस्व संकलन गरेको छ । दुर्घटनामा परेका ३० वटा सवारीसाधनको उद्धारसमेत गरिएको विवरणमा उल्लेख छ ।
घरेलु हिंसाका २७ उजुरी, सबैमा मिलापत्र
महिला, बालबालिका तथा ज्येष्ठ नागरिकसँग सम्बन्धित विषयमा एक महिनामा २७ वटा उजुरी प्रहरीमा परेका छन् । प्रहरीले सबै उजुरीमा मिलापत्र गराइएको जनाएको छ । यसैगरी प्रहरी कार्यालयमा प्रत्यक्ष रूपमा १९५ र जिल्ला प्रशासन कार्यालयमार्फत ३७ गरी कुल २३२ वटा ठाडो उजुरी प्राप्त भएका थिए । प्रहरीका अनुसार सबै उजुरी फछ्र्यौट गरिएको छ ।
कात्तिक महिनामा जिल्लाबाट हराएका २६ जनामध्ये २१ जना फेला परेका छन् । हराउनेमा नौ महिला, दुई बालक र १५ बालिका थिए । तीमध्ये सात महिला, एक बालक र १३ बालिका फेला परेका हुन् ।
डिजिटल निगरानीदेखि विशेष गस्ती
अपराध नियन्त्रण र शान्ति सुरक्षा कायम गर्न प्रहरीले प्रविधिको प्रयोग तथा सुरक्षा निगरानीलाई तीव्र बनाएको दाबी गरेको छ । सीसीटीभी, क्यूआर कोड तथा डिजिटल निगरानी, सामाजिक सञ्जालको अनुगमन र गोप्य सूचना संकलनलाई प्राथमिकतामा राखिएको एसपी भट्टराईले जानकारी दिएका छन् ।
सीमा क्षेत्रमा निगरानी बढाउनुका साथै मोबाइल क्विक रेस्पोन्स टोली परिचालन, नियमित गस्ती र रातिको समयमा वरिष्ठ प्रहरी अधिकृतको कमान्डमा चेकजाँच गर्ने व्यवस्था मिलाइएको प्रहरीले जनाएको छ । आकस्मिक घटनामा तत्काल परिचालन गर्न २४ घण्टा स्ट्यान्डबाइ टोलीसमेत राखिएको छ ।
अपराधिक पृष्ठभूमि भएका व्यक्तिहरूको विगतका गतिविधि र घटनामा संलग्नताका आधारमा ३५ वटा प्रोफाइल तयार पारिएको एसपी भट्टराईले बताएका छन् । प्रहरी कर्मचारीको मनोबल वृद्धि, नागरिकमैत्री सेवा प्रवाह र सुरक्षा व्यवस्थामा सुधारका लागि पनि विभिन्न कार्यक्रम सञ्चालन गरिएको उनको भनाइ छ ।
कात्तिक महिनाको प्रहरी तथ्यांकले पर्सामा आर्थिक अपराध, लागूऔषध कारोबार, भन्सार छली र सडक दुर्घटना नियन्त्रणमा थप प्रभावकारी हस्तक्षेप आवश्यक रहेको देखाएको छ । अपराधका घटना दर्ता र पक्राउको संख्या सार्वजनिक हुनु प्रहरीको सक्रियताको एउटा सूचक भए पनि यस्ता गतिविधिमा दीर्घकालीन नियन्त्रण र नागरिकले अनुभूति गर्ने सुरक्षा सुनिश्चित गर्नु नै प्रहरीको वास्तविक उपलब्धि हुने देखिन्छ ।


























प्रतिक्रिया दिनुहोस् !