वीरगंज (पर्सा), २३ असोज । जिल्ला हुलाक कार्यालय पर्साले १५२औँ विश्व हुलाक दिवस विभिन्न सामाजिक तथा सेवामूलक कार्यक्रम आयोजना गरी मनाएको छ । ‘One Postal Network, Infinite Possibilities’ अर्थात् ‘एक हुलाक सञ्जाल, अनन्त सम्भावना’ भन्ने नारासहित कार्यालयले सेवाग्राही सम्मान, सरसफाइ तथा अस्पतालका बिरामीलाई फलफूल र पानी वितरण गरेको हो ।
विश्व हुलाक दिवसको अवसरमा कार्यालयले पहिलो सेवाग्राहीलाई सम्मान गर्दै सेवा प्रवाहप्रति नागरिकको विश्वास र सम्बन्ध सुदृढ बनाउने प्रयास गरेको छ । त्यसैगरी, कार्यालय परिसरमा सरसफाइ कार्यक्रम सञ्चालन गर्नुका साथै वीरगंजस्थित नारायणी अस्पतालमा उपचाररत बिरामीलाई फलफूल तथा पिउने पानी वितरण गरिएको जिल्ला हुलाक कार्यालय पर्साका कर्मचारी यशवन्त ठाकुरले जानकारी दिए ।
दिवसकै अवसरमा कार्यालयका कर्मचारीलाई भेष्टसमेत वितरण गरिएको उनले बताए । हुलाक सेवाको महत्त्वबारे नागरिकमा जनचेतना फैलाउने, सेवाग्राहीसँगको सम्बन्धलाई थप मजबुत बनाउने र सामाजिक उत्तरदायित्वअन्तर्गत बिरामीलाई सहयोग पुर्याउने उद्देश्यले कार्यक्रम आयोजना गरिएको कार्यालयले जनाएको छ ।
जिल्ला हुलाक कार्यालय पर्साका प्रमुख नमोनाथ प्रसाद यादवको अध्यक्षतामा सम्पन्न कार्यक्रममा कर्मचारीहरू सिमा न्यौपाने, यशवन्त ठाकुर, सुरेश ठगुन्ना, अजय चौधरी, कृष्ण यादव, अन्तिमा साहलगायतको सहभागिता रहेको थियो । विश्व हुलाक दिवस प्रत्येक वर्ष अक्टोबर ९ मा मनाइन्छ । हुलाक सेवाको महत्व, सञ्चार क्षेत्रमा यसको योगदान तथा नागरिकबीच सम्पर्क र सूचना आदानप्रदान सहज बनाउन हुलाक सञ्जालले निर्वाह गर्दै आएको भूमिकाबारे जानकारी गराउनु दिवसको मुख्य उद्देश्य हो । 
प्रतिक्रिया दिनुहोस् !