वीरगंज (पर्सा), २३ असोज । पर्साको धोबीनी गाउँपालिकाले चालु आर्थिक वर्ष २०८३/८४ का लागि ३१ करोड ७ लाख ९७ हजार रुपैयाँको बजेट सर्वसम्मत रूपमा पारित गरेको छ । गाउँपालिकाको १३औँ गाउँसभाबाट बजेट पारित भएसँगै प्रभावित विकास निर्माणका कामलाई तीव्रता दिने र सर्वसाधारणलाई प्रदान गरिने सेवालाई प्रभावकारी बनाउने प्रतिबद्धता जनाइएको छ ।
गाउँपालिकाको सभाहलमा अध्यक्ष मदनप्रसाद चौहानको अध्यक्षतामा सम्पन्न गाउँसभामा प्रमुख प्रशासकीय अधिकृत सञ्जीव कुमार यादवले कार्यक्रम तथा बजेट प्रस्तुत गरेका थिए । उपाध्यक्ष मञ्जु देवी पटेलको निर्देशनमा प्रस्तुत बजेट गाउँसभाले सर्वसम्मत रूपमा पारित गरेको हो । गाउँसभाबाट पारित बजेटमार्फत स्वास्थ्य, शिक्षा, कृषि, महिला तथा बालबालिका, पर्यटन र भौतिक पूर्वाधार विकासलाई प्राथमिकता दिइने अध्यक्ष चौहानले बताए ।
स्थानीय आवश्यकता र नागरिकको अपेक्षालाई सम्बोधन गर्ने गरी विकास निर्माणका कार्यक्रम अघि बढाइने उनको भनाइ छ । गाउँसभा ढिलो गरी सम्पन्न हुँदा विकास निर्माणका काम प्रभावित हुनुका साथै सर्वसाधारणको दैनिक कामकाजमा समेत असर परेको अध्यक्ष चौहानले स्वीकार गरे । गाउँसभा सम्पन्न भएसँगै रोकिएका तथा प्रभावित विकास योजनालाई तीव्रता दिने र गाउँपालिकाबाट प्रवाह हुने सेवालाई छिटोछरितो, सहज तथा प्रभावकारी बनाउने उनले प्रतिबद्धता व्यक्त गरे ।
यसैगरी, प्रमुख प्रशासकीय अधिकृत यादवले आफूलाई सुम्पिएको जिम्मेवारी इमानदारीपूर्वक निर्वाह गर्ने प्रतिबद्धता जनाए । धोबीनी गाउँपालिकालाई स्वच्छ, समृद्ध र नमुना स्थानीय तहका रूपमा विकास गर्न जनप्रतिनिधि, कर्मचारी तथा स्थानीयवासीबीच समन्वय र सहकार्य अपरिहार्य रहेको उनले बताए । गाउँसभामा वडाध्यक्षहरू बन्धु साह तेली, देवेन्द्र पटेल, राजकिशोर पटेल, अबास मियाँ चुरिहार र मनाउर मियाँसहित गाउँसभा सदस्य तथा कर्मचारीहरूको उपस्थिति रहेको थियो ।
कार्यक्रमको सहजीकरण शिक्षा शाखा प्रमुख दीपेन्द्र प्रसाद चौहानले गरेका थिए । बजेट पारित भएसँगै धोबीनी गाउँपालिकासामु अब घोषित प्राथमिकताअनुसार विकास कार्यक्रम कार्यान्वयन गर्ने, प्रभावित योजनालाई गति दिने र नागरिकले अनुभूति गर्ने गरी सेवा प्रवाह सुधार्ने जिम्मेवारी थपिएको छ । 
प्रतिक्रिया दिनुहोस् !