वीरगंज (पर्सा), २२ असोज । वीरगंजस्थित नेशनल मेडिकल कलेजका रेजिडेन्ट चिकित्सकले आफूहरूले लामो समयदेखि भोग्दै आएका समस्या तत्काल समाधान गर्न सरकारसँग हस्तक्षेपको माग गरेका छन् । अध्ययन र काम गर्ने क्रममा कलेज व्यवस्थापनबाट दबाब सिर्जना गरिएको तथा आवश्यक शैक्षिक वातावरण नदिइएको आरोप लगाउँदै उनीहरू २४ दिनदेखि आन्दोलनमा छन् ।
आन्दोलनरत चिकित्सकहरूले मंगलबार सिंहदरबारस्थित शिक्षा तथा खेलकुद मन्त्रालय पुगेर आफ्ना समस्या र माग सरकारसमक्ष औपचारिक रूपमा राखेका हुन् । मन्त्रालयमा भएको छलफलमा पहिलो वर्षमा अध्ययनरत ४० भन्दा बढी रेजिडेन्ट चिकित्सक सहभागी थिए । छलफलका क्रममा चिकित्सकहरूले कलेजभित्र आफूहरूले सामना गर्नुपरेका विभिन्न समस्या मन्त्रालयका उच्च अधिकारीसमक्ष राख्दै अध्ययनका लागि सुरक्षित, शान्तिपूर्ण र मर्यादित वातावरण सुनिश्चित गर्न माग गरे । उनीहरूले समस्या समाधान नभएसम्म तत्काल कलेज फर्किएर अध्ययनमा सहभागी हुने अवस्था नरहेको स्पष्ट पारे ।
रेजिडेन्ट चिकित्सकहरूले निजी मेडिकल कलेजमा ‘फेक फाइल’ र ‘फेक फ्याकल्टी’ रहेको दाबीसमेत गरेका छन् । उनीहरूले यस्ता विषयमा निष्पक्ष छानबिन गरी दोषी देखिएमा सम्बन्धित चिकित्सक तथा व्यक्तिमाथि आवश्यक कारबाही गर्न सरकारसँग माग गरेका छन् । चिकित्सकहरूका अनुसार कलेज व्यवस्थापनको व्यवहार तथा अध्ययनका लागि आवश्यक वातावरणको अभावका कारण आफूहरू नियमित शैक्षिक गतिविधिमा फर्कन सक्ने अवस्थामा छैनन् । त्यसैले सरकारको प्रत्यक्ष पहलबाट समस्या समाधान गरी पुनः अध्ययन गर्ने वातावरण बनाउनुपर्ने उनीहरूको जोड छ ।
‘यो सरकारसँग आशा छ, त्यही भएर यहाँसम्म आएका हौँ,’ आन्दोलनरत चिकित्सकहरूले मन्त्रालयमा बताएका थिए । मन्त्रालयमा भएको छलफलमा शिक्षामन्त्रीका प्रमुख सल्लाहकार शैलेन्द्र झासहित उच्च अधिकारीहरूको सहभागिता थियो । चिकित्सकहरूले सरकार आफ्ना समस्याप्रति गम्भीर भएर समाधानका लागि ठोस कदम चाल्ने अपेक्षा व्यक्त गरेका छन् । शिक्षामन्त्रीका प्रमुख सल्लाहकार झाले रेजिडेन्ट चिकित्सकले उठाएका विषयलाई सरकारले गम्भीरतापूर्वक लिएको बताएका छन् । उनका अनुसार समस्या वास्तविक रूपमा बुझ्नकै लागि चिकित्सकसँग छलफल गरिएको हो ।
‘यो विषयमा सरकार गम्भीर छ । शिक्षामन्त्रीले पनि गम्भीरताका साथ यसलाई हेर्नुभएको छ । हामी यथाशीघ्र यसलाई सम्बोधन गर्छौँ,’ झाले भने । कलेजमा देखिएका समस्या समाधानका लागि सम्बन्धित पक्षसँग समन्वय गरेर आवश्यक कदम चाल्ने विषयमा छलफल भएको मन्त्रालयले जनाएको छ ।
यसैबीच, चिकित्सा शिक्षा आयोगका उपसचिव रामचन्द्र शर्माले पनि रेजिडेन्ट चिकित्सकले उठाएका विषयमा आयोग गम्भीर रहेको बताएका छन् । उनले समस्याको समाधानका लागि आयोगका तर्फबाट आवश्यक पहल गर्ने प्रतिबद्धता जनाएका छन् । सरकार र सम्बन्धित निकायबाट समस्या समाधानका लागि पहल हुने आशा राखेका रेजिडेन्ट चिकित्सकले कलेजमा पुनः शान्तिपूर्ण र मर्यादित वातावरणमा अध्ययन गर्ने अवस्था सिर्जना हुनुपर्ने बताएका छन् । उनीहरूले आफ्ना माग सम्बोधन नभएसम्म आन्दोलन जारी रहने स्पष्ट पारेका छन् । 
प्रतिक्रिया दिनुहोस् !