कलैया (बारा), १८ असोज । राष्ट्रिय स्वतन्त्र पार्टी (रास्वपा) बारामा जिल्ला अधिवेशन लामो समयदेखि हुन नसकेको भन्दै पार्टीका पालिका तथा क्षेत्रीय तहका प्रतिनिधिहरूले केन्द्रीय नेतृत्वमाथि दबाब बढाएका छन् । उनीहरूले जिल्ला अधिवेशनको मिति तत्काल घोषणा गरी विधानअनुसार निर्वाचन प्रक्रिया अघि बढाउन माग गरेका छन् । पालिका तथा क्षेत्रीय समितिका प्रतिनिधिहरूले रास्वपाका महामन्त्री विपिन आचार्य र संसदीय दलका उपनेता गणेश पराजुलीलाई संयुक्त रूपमा ज्ञापनपत्र बुझाउँदै अधिवेशनमा भइरहेको ढिलाइ अन्त्य गर्न माग गरेका हुन् ।
प्रतिनिधिहरूले जिल्ला नेतृत्व चयन कुनै व्यक्ति वा समूहको सहमतिमा नभई पार्टी विधानअनुसार खुला, प्रतिस्पर्धात्मक र पारदर्शी निर्वाचनबाट हुनुपर्नेमा जोड दिएका छन् । उनीहरूका अनुसार तल्लो तहका कार्यकर्ता तथा सदस्यको भावना र जनादेशलाई सम्मान गर्दै निर्वाचित नेतृत्व आए मात्रै जिल्लाको संगठनलाई व्यवस्थित र प्रभावकारी रूपमा अघि बढाउन सकिन्छ ।
‘बारा अधिवेशनमा किन पछाडि ?’
ज्ञापनपत्रमा अधिकांश जिल्लामा अधिवेशन सम्पन्न भइसकेको अवस्थामा बारा भने लामो समयसम्म जिल्ला नेतृत्वविहीन रहनु संगठनात्मक दृष्टिले उचित नभएको उल्लेख गरिएको छ । अधिवेशनमा भएको ढिलाइले जिल्लाको संगठनात्मक हैसियत र पार्टीभित्रको प्रतिनिधित्वमा समेत असर पर्न सक्ने उनीहरूको भनाइ छ । निर्वाचित जिल्ला नेतृत्व नहुँदा स्थानीय जनसरोकारका विषयमा पार्टीको औपचारिक धारणा सार्वजनिक गर्न तथा संगठनात्मक निर्णय लिनसमेत कठिनाइ भइरहेको प्रतिनिधिहरूले बताएका छन् । उनीहरूले अब थप ढिलाइ नगरी जिल्ला अधिवेशनको मिति, समय र स्थान घोषणा गर्न केन्द्रीय नेतृत्वसँग माग गरेका छन् ।
मतदाता सूचीदेखि मतगणनासम्म पारदर्शिता माग
प्रतिनिधिहरूले अधिवेशनलाई औपचारिकता पूरा गर्ने प्रक्रियामा सीमित नगरी सम्पूर्ण निर्वाचन प्रणाली नै पारदर्शी बनाउन माग गरेका छन् । ज्ञापनपत्रमा मतदाता तथा प्रतिनिधिको अन्तिम सूची सार्वजनिक गर्ने, उम्मेदवारी दर्ता, मतदान र मतगणनाको स्पष्ट कार्यतालिका बनाउने तथा निर्वाचनका प्रत्येक चरणलाई निर्धारित विधिअनुसार सञ्चालन गर्नुपर्ने उल्लेख छ ।
त्यसका लागि केन्द्रीय निर्वाचन आयोगमार्फत आवश्यक निर्वाचन समिति वा सम्बन्धित संरचना गठन गरी अधिवेशन सञ्चालनको जिम्मेवारी दिनुपर्ने उनीहरूको माग छ । सदस्यता तथा मतदाता विवरण विधान र निर्वाचन कार्यविधिअनुसार तयार गरी सार्वजनिक गर्नुपर्ने तथा योग्य सबै सदस्यलाई उम्मेदवारी र मतदानमा समान अवसर दिनुपर्नेमा पनि प्रतिनिधिहरूले जोड दिएका छन् ।
‘गुटभन्दा माथि उठेर अधिवेशन गर’
अधिवेशनमा कुनै व्यक्ति, समूह वा गुटको प्रभाव पर्न नदिन प्रतिनिधिहरूले केन्द्रीय नेतृत्वसँग आग्रह गरेका छन् । उनीहरूले उम्मेदवारी दर्तादेखि निर्वाचन परिणाम घोषणा हुँदासम्मको सम्पूर्ण प्रक्रिया निष्पक्ष, समावेशी र पारदर्शी हुनुपर्ने बताएका छन् । विगतमा देखिएका विवादलाई संवाद र समन्वयमार्फत समाधान गर्दै सबै पक्षको सहभागिता सुनिश्चित गर्नुपर्ने उनीहरूको माग छ ।
अधिवेशनका क्रममा आवश्यक सुरक्षा र व्यवस्थापनको प्रबन्ध मिलाउन तथा मिति, समय, स्थान र निर्वाचनसम्बन्धी सम्पूर्ण सूचना सम्बन्धित सदस्यलाई समयमै आधिकारिक माध्यमबाट उपलब्ध गराउनसमेत माग गरिएको छ ।
अधिवेशनपछि संगठन चलायमान बनाउनुपर्ने
प्रतिनिधिहरूले अधिवेशन सम्पन्न भएपछि पार्टी विधानको धारा ३२ र ३३ बमोजिम जिल्ला परिषद् तथा जिल्ला समिति गठन गरी नियमित सांगठनिक गतिविधि तत्काल अघि बढाउनुपर्ने बताएका छन् । उनीहरूको दाबीअनुसार जिल्ला अधिवेशनमा ढिलाइ गर्नुपर्ने कुनै कानुनी बाधा छैन । त्यसैले संगठनको आवश्यकता, सदस्यहरूको लोकतान्त्रिक अधिकार र पार्टी विधानको मर्मअनुसार प्रक्रिया तत्काल अघि बढाउनुपर्ने उनीहरूको जोड छ ।
रास्वपा बाराका पालिका तथा क्षेत्रीय प्रतिनिधिहरूले अब अधिवेशनको मिति तोक्न ढिलाइ नगर्न केन्द्रीय नेतृत्वलाई आग्रह गर्दै निर्वाचन प्रक्रिया तत्काल सुरु गर्न माग गरेका छन् । साथै, यस विषयमा केन्द्रीय नेतृत्वबाट स्पष्ट निर्णयसहित लिखित वा मौखिक प्रतिक्रिया दिनसमेत उनीहरूले अनुरोध गरेका छन् । जिल्ला नेतृत्व चयनको विषय अब थप लम्ब्याउन नहुने भन्दै बाराका प्रतिनिधिहरूले अधिवेशनको मिति घोषणा र निर्वाचन प्रक्रिया सुरु गर्नुलाई संगठनभित्रको तत्कालीन प्राथमिकता बनाउन केन्द्रीय नेतृत्वलाई दबाब दिएका छन् ।
प्रतिक्रिया दिनुहोस् !