वीरगंज (पर्सा), २१ भदौ । जबरजस्ती करणी तथा बलात्कार मुद्दामा १० वर्ष कैद सजाय तोकिएका एक फरार अभियुक्तलाई प्रहरीले पक्राउ गरेको छ । पक्राउ पर्नेमा पर्साको छिपहरमाई गाउँपालिका वडा नम्बर ४ तुलसीबर्वा बस्ने ३५ वर्षीय राजवा भन्ने अखिलेश साह तेली रहेका छन् ।
इलाका प्रहरी कार्यालय भिस्वाबाट खटिएको प्रहरी टोलीले उनलाई शनिबार दिउँसो उनकै घरबाट नियन्त्रणमा लिएको हो । बलात्कार मुद्धामा कसुर ठहर भएपछि अदालतबाट १० वर्ष कैद सजाय तोकिएका तेलीलाई आवश्यक कारबाहीका लागि पर्सा जिल्ला अदालतमा बुझाइएको जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक चक्रबहादुर मल्लले जानकारी दिए ।
यसैबिच, बाराको पचरौता नगरपालिका–७ स्थित बेनौली क्षेत्रबाठ प्रहरीले १५१ किलो गाँजा बरामद गरेको छ । ठूलो परिमाणमा गाँजा बोकेर हिँडिरहेका ८–९ जनाको समूह भने प्रहरीलाई देखेपछि गाँजाका पोका खेतमै छाडेर फरार भएका थिए । जिल्ला प्रहरी कार्यालय बाराका प्रवक्ता प्रहरी नायब उपरीक्षक मिनबहादुर घलेका अनुसार शनिबार राति बजे पचरौता–७ स्थित बेनौली चोकबाट गाँजा बरामद भएको हो ।
यसैगरि पर्साको पर्सागढी नगरपालिका–३ बाट प्रहरीले करिब ४० किलो गाँजा बरामद गरेको छ । विशेष सूचनाका आधारमा जिल्ला प्रहरी कार्यालय पर्साबाट खटिएको प्रहरी टोलीले शनिबार राति स्थानीय ६० वर्षीय गोरे लामाको घरमा छापा मारेको थियो । घर खानतलासी गर्ने क्रममा ड्रमभित्र लुकाएर राखिएको अवस्थामा करिब ४० किलो गाँजा बरामद भएको प्रहरीले जनाएको छ ।
गाँजा भण्डारण तथा बिक्री–वितरणमा संलग्न रहेको आरोपमा प्रहरीले घरधनी लामालाई पक्राउ गरी जिल्ला प्रहरी कार्यालय पर्सामा राखेको छ ।
प्रतिक्रिया दिनुहोस् !