बर्दिवासस्थित बरडाडामा भाइरल ज्वरोको प्रकोप, ७५ प्रतिशत विद्यार्थी विद्यालयबाहिर

बर्दिबास (महोत्तरी), २१ भदौ । महोत्तरीको बर्दिबास नगरपालिका–५ बरडाडामा केही दिनयता बालबालिकामा भाइरल ज्वरोको समस्या बढेको छ । ज्वरोका कारण नेपाल राष्ट्रिय आधारभूत विद्यालयका करिब ७५ प्रतिशत विद्यार्थी विद्यालय जानबाट वञ्चित भएका छन् । विद्यालयका प्रधानाध्यापक बिल्टु यादवका अनुसार विद्यालयमा अध्ययनरत करिब ७५ विद्यार्थीसम्ममध्ये अहिले दैनिक २७ जनाको हाराहारीमा मात्रै उपस्थित हुने गरेका छन् ।

अधिकांश विद्यार्थी बिरामी परेपछि विद्यालयको नियमित पठनपाठनसमेत प्रभावित भएको छ । बरडाडामा स्वास्थ्य संस्था र स्वास्थ्यकर्मीको अभावका कारण बिरामी बालबालिकाले सामान्य उपचारसमेत सहज रूपमा पाउन सकेका छैनन् । स्थानीयका अनुसार गाउँमै सिटामोलजस्तो सामान्य औषधिसमेत उपलब्ध नहुने अवस्था छ । स्थानीय पन्चबहादुर गोलेका अनुसार विद्यालय नजिकै स्वास्थ्य संस्था सञ्चालन गर्ने उद्देश्यले ६–७ वर्षअघि नै भवन निर्माण गरिएको थियो । तर भवन तयार भएको लामो समय बितिसक्दा पनि स्वास्थ्यकर्मी नपठाइएकाले स्वास्थ्य केन्द्र सञ्चालनमा आउन सकेको छैन ।

स्वास्थ्य केन्द्र सञ्चालनमा आए बरडाडासहित आसपासका करिब २५० घरधुरी प्रत्यक्ष लाभान्वित हुने स्थानीयको भनाइ छ । गाउँमा उपचारको आवश्यकता परे स्थानीयले पाँच किलोमिटरभन्दा बढी दूरी तय गरेर टुटेश्वर वा बर्दिबास पुग्नुपर्ने बाध्यता छ । वर्षायाममा माण्डवी गङ्गा अर्थात् मरहा खोला उर्लिएपछि आवतजावतसमेत प्रभावित हुने भएकाले बिरामीलाई उपचारका लागि लैजान थप समस्या हुने गरेको स्थानीय बताउँछन् ।

समस्या सार्वजनिक भएपछि बर्दिबास नगरपालिकाले भने तत्काल स्वास्थ्य टोली परिचालन गर्ने जनाएको छ । नगर प्रवक्ता विजयकुमार महतोले बरडाडामा स्वास्थ्य टोली पठाउने तयारी भइरहेको जानकारी दिएका छन् । नगरपालिकाले सो क्षेत्रमा नगर स्वास्थ्य केन्द्र स्थापना गर्ने तयारीसमेत अघि बढाएको जनाएको छ ।

स्थानीयले भने स्वास्थ्य सेवासँगै सडक र आवश्यक स्थानमा पुल निर्माणलाई प्राथमिकता दिनुपर्ने माग गरेका छन् । सडक तथा पुलको समस्या समाधान भए स्वास्थ्य सेवा लिन र बालबालिकालाई विद्यालय पुर्‍याउन सहज हुने उनीहरूको भनाइ छ । भाइरल ज्वरोका कारण बालबालिका बिरामी भइरहँदा पनि गाउँमा स्वास्थ्यकर्मी, उपचार र सामान्य औषधिसमेत सहज रूपमा उपलब्ध हुन नसकेको शिक्षक देवकुमार लामाले बताए । उनका अनुसार बरडाडाको समस्या तत्काल समाधान गर्न स्थानीय तहले स्वास्थ्य सेवा नियमित र प्रभावकारी बनाउन आवश्यक छ ।