वीरगंज (पर्सा), १८ भदौ । बाढी तथा प्राकृतिक विपद्बाट प्रभावित नागरिकको राहतका लागि वीरगंज–१३ राधेमाईस्थित साउथ जोन माध्यमिक विद्यालयले १ लाख ५५ हजार ५५३ रुपैयाँ सहयोग गरेको छ । विद्यालयका विद्यार्थी, अभिभावक, शिक्षक तथा कर्मचारीबाट स्वेच्छिक रूपमा संकलित रकममा विद्यालयको समेत योगदान थप गरी उक्त सहयोग जुटाइएको हो ।
संकलित रकममध्ये विद्यार्थी तथा अभिभावकबाट ४६ हजार १८२ रुपैयाँ, शिक्षक तथा कर्मचारीले आफ्नो एक दिनको तलब बराबर स्वेच्छिक रूपमा प्रदान गरेको ५७ हजार ८१६ रुपैयाँ र विद्यालयको तर्फबाट ५१ हजार ५५५ रुपैयाँ रहेको छ ।
विद्यालयका प्रधानाध्यापक सरोज प्रसाद चौधरीका अनुसार विपद्को समयमा पीडित नागरिकलाई राहत पुर्याउने उद्देश्यले विद्यालय परिवारले मानवीय भावनासहित सहयोग अभियान अघि बढाएको हो । शिक्षक तथा कर्मचारीले एक दिनको तलब स्वेच्छिक रूपमा सहयोग गरेका थिए भने विद्यार्थी र अभिभावकबाट पनि आफ्नो इच्छाअनुसार रकम संकलन गरिएको उनले बताए ।
विद्यालयबाट प्रदान गरिएको रकमसहित जम्मा भएको १ लाख ५५ हजार ५५३ रुपैयाँ प्याब्सन पर्साको खातामा जम्मा गरिएको सहप्रधानाध्यापक अशोक संग्रौलाले जानकारी दिए । संग्रौलाका अनुसार प्याब्सन पर्साले सदस्य विद्यालयहरूबाट प्राप्त सहयोग रकम प्याब्सन केन्द्रको कोषमा जम्मा गर्नेछ । त्यसपछि प्याब्सन केन्द्रले देशभरका सदस्य विद्यालय तथा अन्य स्रोतबाट संकलित सहयोगलाई एकमुष्ट रूपमा प्रधानमन्त्री दैवी प्रकोप उद्धार कोषमा जम्मा गर्नेछ ।
‘विपद्मा साथ दिनु साझा दायित्व’
प्रधानाध्यापक चौधरीले विपद्को समयमा सहयोगका लागि हातेमालो गर्ने सम्पूर्ण विद्यार्थी, अभिभावक, शिक्षक तथा कर्मचारीप्रति आभार व्यक्त गरेका छन् । दुःख र संकटमा परेका नागरिकलाई सहयोग गर्नु सबैको साझा मानवीय दायित्व भएको बताउँदै उनले सुखमा मात्र नभई विपद्का समयमा समेत एक–अर्काको साथमा उभिनुपर्ने धारणा व्यक्त गरे ।
विद्यालयले ‘मानवताका लागि मानवता’ भन्ने भावनालाई आत्मसात् गर्दै गरेको यस सहयोगले सामाजिक उत्तरदायित्वप्रतिको प्रतिबद्धतालाई समेत उजागर गरेको जनाएको छ ।
प्रतिक्रिया दिनुहोस् !