वीरगंज (पर्सा), ९ भदौ । वीरगंज चिनी कारखाना पुनः सञ्चालनको सम्भाव्यता अध्ययन गर्न गठित सरकारी कार्यदलले मंगलबार कारखाना परिसरको स्थलगत निरीक्षण गरेको छ । सरकारले गत भदौ १ गते उद्योग, वाणिज्य तथा आपूर्ति मन्त्रालयमार्फत वीरगंज चिनी कारखाना पुनः सञ्चालनको सम्भाव्यता अध्ययन गर्न कार्यदल गठन गरेको थियो ।
कार्यदलले मंगलबार कारखाना परिसरमा पुगेर त्यहाँ रहेका भवन, संरचना, मेसिनरी तथा पार्टपुर्जाको अवस्थाबारे स्थलगत जानकारी लिएको हो । पुराना संरचना तथा उपकरणमध्ये पुनः प्रयोग गर्न सकिने अवस्थाबारे समेत अध्ययन भइरहेको जनाइएको छ । मन्त्रिपरिषद्को निर्णयअनुसार खारेजीमा परेको कारखानाको वर्तमान अवस्था, विगतमा भएका निर्णय तथा यसअघि तयार भएका अध्ययन र प्रतिवेदनको समेत कार्यदलले समीक्षा गर्नेछ ।
कार्यदलको संयोजकमा उद्योग, वाणिज्य तथा आपूर्ति मन्त्रालयका सिडिई श्रीकान्त यादव तथा सदस्यमा शाखा अधिकृत ज्योति पौडेल र मन्त्रालयका सल्लाहकार श्याम शर्मा रहेका छन् । मन्त्रालयले कार्यदललाई १५ दिनभित्र अध्ययन प्रतिवेदन पेस गर्न जिम्मेवारी दिएको छ । प्रतिवेदनका आधारमा वीरगञ्ज चिनी कारखाना पुनः सञ्चालनको सम्भाव्यता, आवश्यक लगानी, संरचना तथा आगामी कार्ययोजनाबारे सरकारले निर्णय लिने अपेक्षा गरिएको छ ।
प्रतिक्रिया दिनुहोस् !