महोत्तरीमा साउनमा ८७ मुद्दा दर्ता, ५६ जना पक्राउ

बर्दिबास (महोत्तरी), १ साउन । महोत्तरीमा चालु आर्थिक वर्ष २०८३/८४ को साउन महिनामा विभिन्न प्रकृतिका ८७ वटा मुद्दा दर्ता भएका छन् । जिल्ला प्रहरी कार्यालय महोत्तरीका अनुसार दर्ता भएका मुद्दामध्ये ४० वटा फछ्र्यौट भएका छन् भने ४७ वटा अनुसन्धान तथा कारबाहीको क्रममा बाँकी छन् । साउन २९ गतेसम्मको तथ्यांकअनुसार मुद्दा अनुसन्धानका क्रममा ५६ जना पक्राउ परेका छन् भने ४९ जना फरार रहेका छन्। प्रहरीका अनुसार साउन महिनामा सबैभन्दा बढी अभद्र व्यवहारसम्बन्धी मुद्दा दर्ता भएका छन् । अभद्र व्यवहारका १७ मुद्दामध्ये १५ वटा फछ्र्यौट भएका छन् ।

त्यस्तै, लागुऔषधसम्बन्धी ९ वटा मुद्दा दर्ता हुँदा ८ वटा फछ्र्यौट भएका छन् । ती मुद्दामा १३ जना पक्राउ परेका छन् । ठगीका ३, बैंकिङ कसुरका ९, चोरीका ६, सवारी ज्यानका ३ र ज्यान मार्ने उद्योगका ४ वटा मुद्दा दर्ता भएको प्रहरीले जनाएको छ । जिल्ला प्रहरी कार्यालय महोत्तरीमा हालसम्म कुल ९९२ वटा मुद्दा रहेकोमा ९५ वटा फछ्र्यौट भएका छन् भने ८९७ वटा बाँकी छन् । बाँकी मुद्दामध्ये ९६ वटा जघन्य, १८९ वटा गम्भीर तथा ६१२ वटा सामान्य तथा अन्य प्रकृतिका छन् ।

लागुऔषध नियन्त्रणतर्फ पनि प्रहरीले साउन महिनामा उल्लेख्य परिमाणमा लागुऔषध बरामद गरेको जनाएको छ । ९ वटा मुद्दामा १३ जना पक्राउ पर्दा ४६४.८७२ किलोग्राम गाँजा, ३१.७४० ग्राम खैरो हिरोइन, ३८ थान नाइट्राजेपाम ट्याब्लेट र दुई बोतल आरजेट–स्केन बरामद भएको जिल्ला प्रहरी कार्यालय महोत्तरीका प्रहरी नायब उपरीक्षक पञ्चलाल गोलेले जानकारी दिए । महोत्तरीमा सवारी दुर्घटनासमेत बढेको प्रहरी तथ्यांकले देखाएको छ । गत आर्थिक वर्षको साउनमा ३६ वटा दुर्घटना भएकोमा चालु आर्थिक वर्षको साउन २९ गतेसम्म ८२ वटा दुर्घटना भएका छन् । गत वर्ष दुर्घटनामा ४ जनाको मृत्यु र ५९ जना घाइते भएका थिए भने यस वर्ष ७ जनाको मृत्यु र १२३ जना घाइते भएका छन् ।

अवैध भन्सार छली नियन्त्रणतर्फ प्रहरीले साउन महिनामा २ जनालाई पक्राउ गरी १५ वटा सवारीसाधन नियन्त्रणमा लिएको छ । बरामद तथा नियन्त्रणमा लिइएका सामानको कुल मूल्य ५२ लाख ३० हजार ३० रुपैयाँ रहेको प्रहरी तथ्यांकमा उल्लेख छ । प्रहरीले महोत्तरीमा अपराध नियन्त्रणका प्रमुख चुनौतीका रूपमा नेपाल–भारत खुला सीमा, लागुऔषध ओसारपसार, तस्करी तथा अवैध कारोबार, मानव बेचबिखन, महिला तथा बालबालिकाविरुद्धका अपराध, साइबर अपराध र अनलाइन ठगीलाई औंल्याएको छ । प्रहरी जनशक्ति तथा स्रोतसाधनको कमीलाई समेत अपराध नियन्त्रणमा चुनौतीका रूपमा उल्लेख गरिएको छ ।