चोरीको सुन खरिद गरेको आरोपमा मुना भाई ज्वेलर्सका संचालक सर्राफ पक्राउ

वीरगंज (पर्सा), २४ साउन । वीरगंजको घण्टाघरस्थित मुना भाई ज्वेलर्सका सञ्चालक शंकर सर्राफलाई चोरीको सुन खरिद गरेको आरोपमा प्रहरीले पक्राउ गरेको छ । प्रहरीका अनुसार करिब दुई महिनाअघि पर्साको हरपतगंजका एक १३ वर्षीय बालकले करिब ३ तोला सुनका गहना १० हजार रुपैयाँमा बिक्री गरेको घटनाको अनुसन्धानका क्रममा सर्राफ पक्राउ परेका हुन् ।

जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक चक्रबहादुर मल्लका अनुसार कास्कीको पोखरामा चोरी भएको सुन वीरगंज ल्याएर घण्टाघरस्थित मुना भाई ज्वलेर्समा बिक्री गरिएको खुलेपछि कास्की प्रहरीले पर्सा प्रहरीसँग समन्वय गरेको थियो । कास्की प्रहरीले चोरीको सुन बिक्री भएको स्थानबारे अनुसन्धान गर्दै वीरगंजको मुना भाई ज्वलेर्ससम्म पुगेपछि पर्सा प्रहरीको सहयोगमा सर्राफलाई पक्राउ गरिएको प्रहरीले जनाएको छ ।

यता, मुना भाई ज्वलेर्सका सञ्चालकका दाजु मुनाले भने पसलले चोरीको सुन खरिद नगरेको दाबी गरेका छन् । उनका अनुसार प्रहरीले सुन बिक्री गर्ने भनिएका बालकले समेत आफूहरूले सुन बिक्री गरेको पसल स्पष्ट रूपमा पहिचान गर्न नसकेको र बयानमा फरक–फरक कुरा बताउँदै आएको बताएका छन् । उनले प्रहरीले लगाएको आरोपबारे आफूहरूलाई पूर्ण जानकारी नभएको भन्दै चोरीको सुन खरिद नगरेको दाबी गरेका छन् । घटनाबारे कास्की र पर्सा प्रहरीले संयुक्त रूपमा थप अनुसन्धान गरिरहेको जनाएको छ ।