वीरगंज (पर्सा), २४ साउन । लिडरशिप डेभलपमेन्ट इन्स्टिच्युट अफ नेपाल (एल. डी. आई.) को आयोजनामा लिटिल बडी प्रिस्कूल, वीरगंजका शिक्षकहरूका लागि प्रभावकारी शिक्षण अभ्याससम्बन्धी अर्धदिवसीय प्रशिक्षण कार्यक्रम सम्पन्न भएको छ । बालबालिकाको सिकाइ, व्यवहार तथा समग्र विकासलाई थप प्रभावकारी बनाउन शिक्षकहरूको व्यावसायिक क्षमता अभिवृद्धि गर्ने उद्देश्यले आयोजित प्रशिक्षणमा ‘समयपालना तथा जिम्मेवार कार्यशैली, अभिभावकसँग प्रभावकारी सञ्चार, टिमवर्क तथा समन्वय, सञ्चारको उचित शृंखला, नियमित कार्य जाँच तथा निरीक्षण, रिपोर्टिङ र जवाफदेहिता’ लगायतका विषयमा प्रशिक्षण दिइएको थियो ।
लिटिल बडी प्रिस्कूलका प्रिन्सिपल विजय कुमार बलका अनुसार प्रशिक्षणमा उल्लेखित विषयहरूलाई चार मुख्य मोड्युलअन्तर्गत समेटिएको थियो । प्रशिक्षणका क्रममा सहभागी शिक्षकहरूले कक्षाकोठामा देखिने विभिन्न परिस्थिति तथा आफ्ना अनुभवहरू आदानप्रदान गर्दै बालबालिकाको सिकाइ र व्यवहारलाई प्रभावकारी बनाउन अपनाउन सकिने शिक्षण अभ्यासबारे छलफल गरेका थिए । कार्यक्रममा एल. डी. आई. नेपालका प्रशिक्षक अनिल जयसवालले प्रशिक्षण दिएका थिए । उनले प्रारम्भिक बालशिक्षामा शिक्षकको भूमिका कक्षाकोठामा पढाउने कार्यमा मात्र सीमित नरहने बताउँदै समयपालना, सकारात्मक अभिभावक सञ्चार, आपसी सहकार्य, नियमित अनुगमन र निरन्तर सुधार प्रभावकारी शिक्षण वातावरण निर्माणका महत्वपूर्ण आधार भएको उल्लेख गरे ।
प्रशिक्षणले शिक्षकहरूलाई आफ्ना दैनिक कार्यशैली, कक्षाकोठाको अभ्यास तथा बालबालिकासँगको व्यवहारलाई थप व्यवस्थित र प्रभावकारी बनाउने विषयमा अनुभव तथा ज्ञान आदानप्रदान गर्ने अवसर प्रदान गरेको थियो । एल. डी. आई. नेपालले विद्यालय तथा शिक्षकहरूको क्षमता अभिवृद्धि गर्दै प्रभावकारी, बालकेन्द्रित र गुणस्तरीय शिक्षण अभ्यास विकास गर्ने उद्देश्यले यस्ता प्रशिक्षण तथा क्षमता विकास कार्यक्रमलाई निरन्तरता दिँदै आएको जनाएको छ ।
प्रतिक्रिया दिनुहोस् !