वीरगंज (पर्सा), ५ साउन । पर्साको कालिकामाई गाउँपालिका–३ का वडाध्यक्ष संजय पटेल कर्मचारी कुटपिट तथा दुर्व्यवहार प्रकरणमा पक्राउ परेपछि १० हजार रुपैयाँ धरौटी बुझाएर रिहा भएका छन् । अभद्र व्यवहार मुद्दामा जिल्ला प्रशासन कार्यालय पर्साले धरौटीमा रिहा गर्ने आदेश दिएको हो । जिल्ला प्रशासन कार्यालयका अनुसार प्रमुख जिल्ला अधिकारी भोला दाहालको आदेशपछि वडाध्यक्ष पटेललाई १० हजार रुपैयाँ धरौटीमा छाडिएको हो ।
प्रहरीले मंगलबार बिहान कालिकामाई गाउँपालिका–३ हरिहरपुर बिर्तास्थित निवासबाट उनलाई नियन्त्रणमा लिएको जनाएको थियो । गाउँपालिकाका कर्मचारीमाथि कुटपिट तथा दुर्व्यवहार गरेको आरोपमा पक्राउ गरिएको तथ्य जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्र मल्लले पुष्टि गरेका थिए । इलाका प्रहरी कार्यालय पोखरियाले नियन्त्रणमा लिएपछि सोही दिन वडाध्यक्ष पटेललाई आवश्यक कारबाहीका लागि जिल्ला प्रशासन कार्यालयमा उपस्थित गराएको थियो ।
यो घटनापछि कालिकामाई गाउँपालिकाका सम्पूर्ण कर्मचारी आन्दोलित बनेका थिए । कर्मचारीहरूले दोषीमाथि कानुनी कारबाहीको माग गर्दै नियमित कामसमेत प्रभावित हुने गरी विरोध जनाएका थिए । गत असार २३ गते गाउँ कार्यपालिकाको कार्यालयभित्र कार्यालय समयमै कार्यरत कम्प्युटर अपरेटर चन्दनकुमार चौरसियामाथि कुटपिट तथा दुर्व्यवहार भएको आरोप छ । आफ्नो जिम्मेवारी निर्वाह गरिरहेका कर्मचारीमाथि योजनाबद्ध रूपमा आक्रमण गरिएको भन्दै कर्मचारीहरूले घटनाको निष्पक्ष छानबिन र दोषीलाई कानुनबमोजिम कारबाही गर्न माग गर्दै आन्दोलन गर्दै आएका छन् ।
यस घटनामा प्रहरीले वडाध्यक्ष पटेलसहित तीन जनाविरुद्ध अभद्र व्यवहार मुद्दा दर्ता गरेको छ । तीमध्ये अन्य दुई जना अझै फरार रहेको प्रहरीले जनाएको छ । यता, धरौटीमा रिहा भएपछि वडाध्यक्ष पटेलले भने आफूलाई प्रहरीले पक्राउ नगरेको दाबी गरेका छन् । उनका अनुसार उनी स्वयं बयान दिन जिल्ला प्रशासन कार्यालयमा उपस्थित भएका थिए, पक्राउ परेर लगिएको होइन ।
प्रतिक्रिया दिनुहोस् !