वीरगंज (पर्सा), २५ असार । लामो समय देखि तलव नपाएको भन्दै आन्दोलनमा उत्रिएका वीरगंज महानगरपालिकाका कर्मचारी र महानगरबी सहमति भएको छ । विहिवार दिउँसो भएको सहमति अनुसार कर्मचारी पक्षले आन्दोलनका सबै कार्यक्रम फिर्ता लिएका छन् । कार्यवाहक नगरप्रमुख र प्रमुख प्रशासकीय अधिकृतसँग भएको वार्तामा सहमति भएपछि कर्मचारी काममा फर्किएका हुन् ।
दुई महिनाको बक्यौता तलब उपलब्ध गराउन माग गर्दै बिहीबार बिहानदेखि आन्दोलनमा उत्रिएका कर्मचारीसँग भएको छलफलमा बिहीबार नै एक महिनाको तलब निकासा गर्ने सहमति भएपछि आन्दोलन स्थगित गरिएको हो । सहमतिपछि कर्मचारी अपराह्न ३ बजेदेखि नियमित काममा फर्किएका छन् । हानगरपालिकाका कार्यवाहक नगरप्रमुख इम्तियाज आलमले आजै (बिहीबार) कर्मचारीको एक महिनाको तलब निकासा गरिने जानकारी गराएपछि आन्दोलनका सम्पूर्ण कार्यक्रम स्थगित गरिएको आन्दोलनका अगुवा तथा महानगरपालिकाका कर्मचारी मुकेश गुप्ताले जानकारी दिए ।
उनका अनुसार प्रमुख प्रशासकीय अधिकृत बसन्तबहादुर बोहराको उपस्थितिमा कार्यवाहक नगरप्रमुखले कर्मचारीको खातामा तलब जम्मा गरिने आश्वासन दिएपछि सम्पूर्ण कर्मचारी नियमित काममा फर्किएका हुन् । यसअघि बिहानैदेखि कर्मचारीले कार्यालयको कामकाज अवरुद्ध गर्दै लेखा शाखामा तालाबन्दी गरेर आन्दोलन सुरु गरेपछि विभिन्न सेवा लिन महानगरपालिका पुगेका सेवाग्राहीले सास्ती खेप्नुपरेको थियो । आन्दोलन स्थगित भएसँगै महानगरपालिकाको नियमित सेवा प्रवाह र प्रशासनिक कामकाज पुनः सुचारु भएको छ ।
प्रतिक्रिया दिनुहोस् !