वीरगंज (पर्सा), २३ असार । त्रिभुवन राजमार्गअन्तर्गत वीरगंजको मुख्य सडक क्षेत्रमा सडक सीमाभित्र निर्माण गरिएका घर तथा अन्य संरचना हटाउने अभियानलाई सडक डिभिजन कार्यालय हेटौंडाले तीव्र बनाएको छ । मंगलबार मात्रै सात वटा डोजर परिचालन गरी अतिक्रमण हटाउने कार्यलाई निरन्तरता दिइएको हो ।
सडक डिभिजन कार्यालय हेटौंडाका इन्जिनियर तथा वीरगंजका फोकल पर्सन दुर्गा प्रसादका अनुसार परिचालित सातमध्ये एउटा डोजर उच्च अदालत आसपासको क्षेत्रमा र बाँकी छ वटा डोजर मुर्ली क्षेत्रमा खटिएका छन् । उनका अनुसार मंगलबार दिउँसो साढे ३ बजेसम्म गण्डक चोकदेखि मुर्लीसम्मका करिब ७० वटा निजी घर तथा संरचना हटाइसकिएको छ । यद्यपि सोही क्षेत्रमा पर्ने करिब आधा दर्जन सरकारी भवनका संरचनामा भने हालसम्म डोजर चलाइएको छैन ।
वीरगंजको मुख्य सडक विस्तार तथा सडक सीमा संरक्षणका लागि सडक अतिक्रमण हटाउने अभियान गत शुक्रबारदेखि सुरु गरिएको थियो । कृषि औजार कारखाना क्षेत्रसम्मका संरचना हटाइएपछि बहुअरीका स्थानीयले विरोध जनाउँदै अवरोध गरेकाले शुक्रबार साँझ अभियान रोकिएको थियो ।
त्यसपछि सोमबार बिहान साढे ६ बजेदेखि सडक डिभिजन कार्यालयले पुनः डोजर परिचालन गर्दै अतिक्रमण हटाउने कार्यलाई निरन्तरता दिएको हो । यता, सडक विस्तारबाट प्रभावित स्थानीय बासिन्दाले भने उचित समन्वय, आवश्यक व्यवस्थापन तथा वैकल्पिक उपाय सुनिश्चित गरेपछि मात्रै सडक विस्तारको काम अघि बढाउनुपर्ने माग राख्दै आएका छन् ।
प्रतिक्रिया दिनुहोस् !