वीरगंज (पर्सा), २२ असार । वीरगंजस्थित ‘कुशवाहा मोटर्स’ले ई–स्कुटर आगलागी प्रकरणमा जिल्ला प्रशासन कार्यालय पर्साले गरेको दुई पटकको छलफल आह्वानसमेत बेवास्ता गरेको आरोप लागेको छ । पीडित प्रदीप साहका अनुसार आगलागी घटनापछि समाधानका लागि जिल्ला प्रशासन कार्यालय पर्साले दुई फरक मितिमा छलफलको समय निर्धारण गरी कम्पनीका सञ्चालकलाई उपस्थित हुन निर्देशन दिएको थियो । तर दुवै पटक कम्पनीका प्रतिनिधि वा सञ्चालक उपस्थित नभएको उनले बताएका छन् ।
घटनासम्बन्धी साहले जिल्ला प्रशासन कार्यालय पर्सामा निवेदन दर्ता गर्दै निष्पक्ष छानबिन, आफूले बेहोरेको क्षतिको उचित मूल्याङ्कन, क्षतिपूर्ति तथा कानुनबमोजिम आवश्यक कारबाहीको माग गरेका छन् । निवेदनअनुसार २०८३ साल जेठ २१ गते बिहान करिब ७ः४० बजे उनका बुबा किशन साह कानुको नाममा दर्ता रहेको म.प्र.०३–०३९ प १४४३ नम्बरको ई–स्कुटर घरभित्र पार्किङ गरी राखिएको अवस्थामा अचानक ब्याट्री पड्किएर आगलागी भएको थियो ।
आगलागीका कारण ई–स्कुटर पूर्ण रूपमा नष्ट भएको मात्र नभई आगो घरको प्यासेज, भुइँतल्लाको कोठा, विद्युत् लाइन, सम्पूर्ण वायरिङ तथा इन्टरनेट राउटरसम्म फैलिएको निवेदनमा उल्लेख गरिएको छ । पीडितका अनुसार उक्त घटनाबाट करिब पाँच लाख रुपैयाँ बराबरको आर्थिक क्षति पुगेको छ । आगलागी भएको ई–स्कुटर वीरगंजस्थित कुशवाहा मोटर्सबाट खरिद गरिएको उल्लेख गर्दै विक्रेता पक्षको जिम्मेवारी निर्धारण गरी कानुनअनुसार क्षतिपूर्ति उपलब्ध गराउन प्रशासनसँग माग गरिएको छ ।
साथै, जिल्ला प्रशासन कार्यालयमार्फत विक्रेता पक्षलाई उपस्थित गराई घटनाको निष्पक्ष अनुसन्धान, वास्तविक क्षतिको मूल्याङ्कन तथा कानुनी प्रक्रियाअनुसार क्षतिपूर्ति सुनिश्चित गरिदिन पनि पीडितले आग्रह गरेका छन् ।
प्रतिक्रिया दिनुहोस् !