गौशाला (महोत्तरी), २० असार । महोत्तरीको गौशाला नगरपालिकामा कार्यरत आठ जना नगर प्रहरीलाई नेपाल प्रहरीले नियन्त्रणमा लिएपछि स्थानीय तहका कर्मचारीहरू आन्दोलनमा उत्रिएका छन् । घटनाको विरोधमा गौशाला नगरपालिकाले पेनडाउन आन्दोलन सुरु गर्दै सम्पूर्ण सेवा अनिश्चितकालका लागि बन्द गरेको छ भने भंगहा नगरपालिकाका कर्मचारीहरूले पनि ऐक्यबद्धता जनाउँदै पक्राउको विरोध गरेका छन् ।
गौशाला नगरपालिकाले शुक्रबार जारी गरेको विज्ञप्तिअनुसार बिहीबार साँझ करिब ५ बजे कार्यालयमा नियमित ड्युटीमा रहेका आठ जना नगर प्रहरीलाई नेपाल प्रहरीको टोलीले कार्यालय परिसरबाट नियन्त्रणमा लिएको थियो । नगरपालिकाले घटनामा कुनै पूर्वसूचना वा समन्वय नगरिएको दाबी गर्दै यसले स्थानीय सरकारअन्तर्गत कार्यरत कर्मचारीको सुरक्षामाथि प्रश्न उठाएको जनाएको छ ।
नगरपालिकाले पक्राउ परेका नगर प्रहरीलाई तत्काल रिहा गर्न तथा स्थानीय तहमा कार्यरत कर्मचारीहरूको सुरक्षाको प्रत्याभूति गर्न सम्बन्धित निकायसँग माग गरेको छ । घटनाको विरोधस्वरूप नगरपालिकाका कर्मचारीहरूले पेनडाउन आन्दोलन सुरु गरेका छन् । पक्राउ परेका नगर प्रहरीको रिहाइ र कर्मचारीहरूको सुरक्षाको सुनिश्चितता नभएसम्म सेवा प्रवाह नगर्ने निर्णय गरिएको नगरपालिकाले जनाएको छ ।
यससँगै गौशाला नगरपालिकाको केन्द्रीय कार्यालय, सबै वडा कार्यालय, नगरभित्र सञ्चालित स्वास्थ्य संस्था तथा सामुदायिक विद्यालयबाट प्रदान गरिने सेवा अनिश्चितकालका लागि बन्द गरिएको छ । यता, भंगहा नगरपालिकाका कर्मचारीहरूले पनि संयुक्त विज्ञप्ति जारी गर्दै घटनाको विरोध गरेका छन् । विज्ञप्तिमा कुनै पूर्वसूचना वा समन्वयबिना नगर प्रहरीलाई नियन्त्रणमा लिइएको घटनाले स्थानीय तहका कर्मचारीमा असुरक्षा र त्रासको वातावरण सिर्जना भएको उल्लेख गरिएको छ ।
उनीहरूले स्थानीय सरकारको जिम्मेवारी निर्वाह गरिरहेका नगर प्रहरीमाथिको यस्तो व्यवहारले संविधानले स्थानीय तहलाई प्रदान गरेको अधिकार तथा कर्मचारीहरूको मनोबलमा नकारात्मक असर परेको बताएका छन् । उता, जिल्ला प्रहरी कार्यालय महोत्तरीका प्रहरी नायव उपरीक्षक पञ्चलाल गोलेले निगौल गाई गौशालाको जग्गामा नाला निर्माण गर्ने क्रममा विवाद उत्पन्न भएको बताए ।
उनका अनुसार विवादका क्रममा निगौल गाई गौशालाकी कार्यालय प्रमुख कुन्तीकुमारी पाण्डेमाथि हातपात तथा दुर्व्यवहार भएको आरोपपछि घटनामा संलग्न आठ जना नगर प्रहरीलाई नियन्त्रणमा लिइएको हो । घटनाबारे थप अनुसन्धान भइरहेको छ ।
प्रतिक्रिया दिनुहोस् !