राजविराज (सप्तरी), २० असार । सप्तरीको राजविराजस्थित कारागार कार्यालयमा ड्युटीका क्रममा एसएलआर राइफलबाट अचानक गोली चल्दा एक प्रहरी जवान घाइते भएका छन् । घटनामा संलग्न प्रहरी जवानलाई नियन्त्रणमा लिएर प्रहरीले अनुसन्धान सुरु गरेको छ ।जिल्ला प्रहरी कार्यालय सप्तरीका अनुसार बुधबार राति राजविराज नगरपालिका–६ स्थित कारागारको ‘ए’ ब्लकअन्तर्गत पोस्ट नं. ३ मा ड्युटीमा रहेका नेपाल प्रहरी विशेष सुरक्षा गण, ढल्केबर (धनुषा) दरबन्दीका २२ वर्षीय प्रहरी जवान बिसोजित राय घाइते भएका हुन् ।
राति १० बजेदेखि २ बजेसम्मको ड्युटीमा रहेका राय शौचालयबाट पोस्टतर्फ फर्किने क्रममा पोस्ट नं. ४ मा खटिएका २२ वर्षीय प्रहरी जवान अजयकुमार महतोको हातमा रहेको एसएलआर राइफलबाट अचानक एक राउन्ड गोली चलेको प्रहरीले जनाएको छ । गोली रायको कम्मरमाथिको ढाडमा लागेको थियो । उनलाई तत्काल उपचारका लागि राजविराजस्थित गजेन्द्रनारायण सिंह अस्पताल लगिएको थियो । त्यहाँ प्रारम्भिक उपचारपछि थप उपचारका लागि धरानस्थित बीपी कोइराला स्वास्थ्य विज्ञान प्रतिष्ठान रेफर गरिएको प्रहरीले जनाएको छ ।
जिल्ला प्रहरी कार्यालय सप्तरीका प्रवक्ता प्रहरी नायब उपरीक्षक हेमराज घिमिरेले घटनाको पुष्टि गर्दै घटनामा संलग्न प्रहरी जवान महतोलाई नियन्त्रणमा लिई आवश्यक अनुसन्धान अघि बढाइएको जानकारी दिए । प्रहरीका अनुसार घाइते प्रहरी जवान रायको स्वास्थ्य अवस्था हाल सामान्य रहेको छ ।
प्रतिक्रिया दिनुहोस् !