वीरगंज (पर्सा), १८ असार । यातायात व्यवस्था कार्यालय वीरगंजमा मोटरसाइकल नामसारीको विषयमा भएको विवादपछि अभद्र व्यवहार सम्बन्धी मुद्दामा पक्राउ परेका सेवाग्राही रामकुमार महतो ५ हजार रुपैयाँ धरौटीमा रिहा भएका छन् । वीरगंज महानगरपालिका–१२ निवासी २४ वर्षीय महतोलाई प्रमुख जिल्ला अधिकारी भोला दाहालको इजलासले बिहीबार धरौटीमा रिहा गर्न आदेश दिएको हो ।
जिल्ला प्रशासन कार्यालय पर्साका सूचना अधिकारी तथा सहायक प्रमुख जिल्ला अधिकारी कृष्ण थापाले महतो धरौटी बुझाएर रिहा भएको पुष्टि गरे । उनले धरौटी रकम खुलाउन नमाने पनि प्रशासन स्रोतका अनुसार ५ हजार रुपैयाँ धरौटी तोकिएको थियो । महतोलाई गत मंगलबार मोटरसाइकल नामसारी गराउन यातायात व्यवस्था कार्यालय वीरगंज पुगेका बेला वडा प्रहरी कार्यालय श्रीपुरले नियन्त्रणमा लिएको थियो । उनीविरुद्ध भोलिपल्ट अभद्र व्यवहार सम्बन्धी मुद्दा दर्ता गरिएको थियो ।
यातायात कार्यालय स्रोतका अनुसार महतोले आफूले खरिद गरेको गोपाल बस्नेतको नाममा रहेको मोटरसाइकल आफ्नो नाममा नामसारी गरिदिन आग्रह गरेका थिए । उनले नागरिकताको प्रतिलिपि, सवारी चालक अनुमति पत्र (लाइसेन्स) तथा नागरिक एपमा रहेका कागजातसमेत प्रस्तुत गर्दै प्रक्रिया अघि बढाइदिन अनुरोध गरेका थिए । तर फाँट प्रमुख प्रेम कार्कीले आवश्यक कागजात नपुगेको भन्दै नामसारी गर्न अस्वीकार गरेपछि विवाद उत्पन्न भएको बताइएको छ ।
स्रोतका अनुसार नामसारी प्रक्रिया अघि बढाइदिन महतोले जोड दिएपछि फाँट प्रमुख कार्कीले प्रहरीलाई खबर गरेका थिए । त्यसपछि उनलाई नियन्त्रणमा लिएर वडा प्रहरी कार्यालय श्रीपुर लगिएको थियो । प्रारम्भमा सहमतिमार्फत विवाद समाधान गर्ने प्रयास गरिए पनि सहमति हुन नसकेपछि बुधबार उनीविरुद्ध अभद्र व्यवहार सम्बन्धी मुद्दा दर्ता गरिएको प्रहरी स्रोतले जनाएको छ ।
घटनाबारे सञ्चारमाध्यममा समाचार सार्वजनिक भएपछि प्रहरीले अनुसन्धान प्रक्रिया तीव्र बनाउँदै बिहीबार मुद्दाको फाइल जिल्ला प्रशासन कार्यालय पर्सामा पेश गरेको थियो । वडा प्रहरी कार्यालय श्रीपुरले फाइल प्रशासनमा बुझाइएको पुष्टि गरेको थियो । त्यसपछि सोही दिन प्रमुख जिल्ला अधिकारीको इजलासले महतोलाई ५ हजार रुपैयाँ धरौटीमा रिहा गर्न आदेश दिएको हो ।
प्रतिक्रिया दिनुहोस् !