कलैया (बारा), १२ असार । बाराबाट प्रतिनिधि सभा सदस्यमा निर्वाचित चार सांसदमध्ये दुई जना राष्ट्रिय स्वतन्त्र पार्टीको केन्द्रीय सदस्यमा निर्वाचित भएका छन भने दुई सांसद पराजित भएका छन् ।
चितवनमा जारी प्रथम राष्ट्रिय महाधिवेशनबाट बारा क्षेत्र नं. ४ का सांसद रहबर अन्सारी र बारा क्षेत्र नं. ३ का सांसद अरविन्द साह केन्द्रीय सदस्यमा निर्वाचित भएका हुन् । अन्सारी मुस्लिम समूह र साह मधेसी समूहबाट बिजयी भएका हुन् । अन्सारीले प्रवासको २२ सहित एक हजार ४७ मत प्राप्त गरे । यसैगरी साहले ९ सय ७० मत पाएर विजयी भए ।
साहले प्रवासबाट ६ मत मात्रै पाएका छन् । दुई सांसद केन्द्रीय सदस्यमा निर्वाचित हुँदै गर्दा अर्का दुई सांसद भने पराजित भएका छन् । बारा क्षेत्र नं. २ का सांसद चन्दन सिंह र बारा क्षेत्र नं. १ का सांसद गणेश धिमाल भने पराजित भएका हुन् । उनीहरुले भूगोलतर्फबाट केन्द्रीय सदस्यमा उम्मेदवारी दिएका थिए ।
प्रतिक्रिया दिनुहोस् !