सरुवा भएको एकवर्ष बित्दा पनि दरबन्दीमा गएनन् बरिष्ठ सई लामा

वीरगंज (पर्सा), ३१ जेठ । जिल्ला प्रहरी कार्यालय पर्सामा कार्यरत बरिष्ठ प्रहरी नायब निरीक्षक (बरिष्ठ सई) मेगजन लामा सरुवा भएको एक वर्षभन्दा बढी समय बितिसक्दा पनि आफ्नो दरबन्दी रहेको कार्यालयमा नपुगेको तथ्य सार्वजनिक भएको छ । प्रहरी स्रोतका अनुसार लामाको सरुवा प्रदेश प्रहरी गण, ढल्केबरमा भइसकेको भए पनि उनी हालसम्म त्यहाँ हाजिर हुन गएका छैनन् । बरु काज सरुवामार्फत जिल्ला प्रहरी कार्यालय पर्सामै रहेर सुबेदार मेजरको जिम्मेवारी सम्हालिरहेका छन् ।

स्रोतका अनुसार प्रदेश प्रहरीको काज अवधि समाप्त भइसके पनि लामाले दरबन्दी भएको कार्यालयमा रवाना हुने प्रक्रिया अघि नबढाएको बताइएको छ । प्रहरी संगठनभित्र उनको लामो समयदेखिको बसाइबारे विभिन्न प्रश्न उठ्न थालेका छन् । प्रहरी वृत्तमा भएको चर्चाअनुसार लामाकी श्रीमती समेत नेपाल प्रदेश प्रहरी कार्यालय, वीरगंजमा कार्यरत रहेकाले उनी पर्सा नछाड्न चाहेको बताइन्छ । पारिवारिक तथा व्यक्तिगत कारण देखाउँदै उनी वीरगंजमै बस्न खोजिरहेको चर्चा प्रहरी संगठनभित्र भइरहेको स्रोतको दाबी छ ।

बाराको सिमरा उपमहानगरपालिका निवासी लामा घरपायक पर्ने स्थानमा बस्न चाहेकाले संगठनभित्रको पहुँच र प्रभाव प्रयोग गरी सरुवा कार्यान्वयन हुन नदिएको आरोप समेत लाग्दै आएको छ । उनीसँगै सरुवा भएका अधिकांश प्रहरी कर्मचारी भने आ–आफ्नो नयाँ कार्यस्थलमा पुगिसकेका छन् । यस विषयमा जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरिबहादुर बस्नेतले संगठनको आवश्यकता अनुसार प्रहरी कर्मचारीलाई काजमा खटाइने गरेको बताए । लामाले प्रभावका आधारमा लामो समयदेखि काजमै बसेको भन्ने आरोपबारे सञ्चारकर्मीले जिज्ञासा राख्दा उनले त्यसलाई अस्वीकार गरे ।

‘संगठनको आवश्यकताअनुसार काजमा खटाउने व्यवस्था छ। काजको निश्चित समयसीमा नै तोकिएको हुँदैन,’ प्रवक्ता बस्नेतले भने । प्रहरी संगठनभित्र सरुवा निर्णयको कार्यान्वयनमा समान मापदण्ड लागू हुनुपर्ने बहस भइरहेका बेला बरिष्ठ सई लामाको विषयले फेरि एकपटक प्रहरी प्रशासनभित्रको काज र सरुवा व्यवस्थापनमाथि प्रश्न खडा गरेको छ ।