वीरगंज (पर्सा), २९ जेठ । सामुदायिक विद्यालयहरूले अतिरिक्त कक्षा, कोचिङ तथा ट्युसनका नाममा विद्यार्थीबाट शुल्क असुल गरेको आरोपसँग सम्बन्धित रिट निवेदनमा उच्च अदालत जनकपुरले विपक्षीहरूका नाममा कारण देखाउ आदेश जारी गरेको छ ।
उच्च अदालत जनकपुरका न्यायाधीश कमलप्रसाद पोखरेलको एकल इजलासले रिटमाथि प्रारम्भिक सुनुवाइ गर्दै सम्बन्धित पक्षहरूलाई लिखित जवाफ पेश गर्न निर्देशन दिएको हो । धनुषाको विदेह नगरपालिका–१ निवासी शिवसागर ठाकुरले जनता नमुना माध्यमिक विद्यालय, गिद्दा बेलापट्टी, माध्यमिक विद्यालय ठाडीझिझा, विदेह नगरपालिका तथा सम्बन्धित पदाधिकारीहरूलाई विपक्षी बनाएर रिट दायर गरेका थिए ।
निवेदनमा सामुदायिक विद्यालयले अतिरिक्त कक्षा र कोचिङका नाममा विद्यार्थीसँग शुल्क उठाएको दाबी गरिएको छ । रिट निवेदकका तर्फबाट अधिवक्ताद्वय पवनकुमार झा र बलराम तिवारीले बहस गरेका थिए । अदालतले निवेदनमा उठाइएका विषयवस्तुबारे विपक्षी पक्षको धारणा आवश्यक देखिएको भन्दै १५ दिनभित्र आफैँ वा कानुनबमोजिमका प्रतिनिधिमार्फत लिखित जवाफ पेश गर्न आदेश दिएको छ । 
प्रतिक्रिया दिनुहोस् !