वीरगंज (पर्सा), १० जेठ । आर्थिक वर्ष २०८२/०८३ को वार्षिक कार्यसम्पादन मूल्यांकनमा मधेश प्रदेशका जिल्ला प्रहरी कार्यालयहरूमध्ये जिल्ला प्रहरी कार्यालय पर्सा उत्कृष्ट घोषित भएको छ । शान्ति सुरक्षा कायम, अपराध नियन्त्रण तथा प्रभावकारी सेवा प्रवाहमा उत्कृष्ट प्रदर्शन गरेपछि पर्सा प्रहरीले यो सफलता हासिल गरेको हो ।
मधेश प्रदेश प्रहरी कार्यालय जनकपुरले गरेको मूल्यांकनमा उत्कृष्ट नतिजा ल्याएपछि प्रदेश प्रहरी प्रमुख प्रहरी नायब महानिरीक्षक गोविन्द थपलिया ले जिल्ला प्रहरी कार्यालय पर्साका प्रमुख प्रहरी उपरीक्षक सुदीप राज पाठक लाई प्रशंसापत्रसहित सम्मान गरेका हुन् ।
जिल्ला प्रहरी कार्यालय पर्साका अनुसार वार्षिक कार्यसम्पादन मूल्यांकन विभिन्न सूचकका आधारमा गरिएको थियो । शान्ति सुरक्षा व्यवस्थापन, अपराध अनुसन्धान तथा नियन्त्रण, नागरिकलाई प्रदान गरिने सेवा, संगठनात्मक कार्यक्षमता लगायतका पक्षमा उत्कृष्ट कार्यसम्पादन गर्दै पर्सा जिल्ला प्रहरी कार्यालय प्रदेशकै उत्कृष्ट कार्यालयका रूपमा छनोट भएको जनाइएको छ ।
सम्मान ग्रहणपछि प्रहरी उपरीक्षक पाठकले प्राप्त उपलब्धि सम्पूर्ण प्रहरी कर्मचारीको मेहनत, अनुशासन र नागरिकको निरन्तर सहयोगको परिणाम भएको बताएका छन् । उनले आगामी दिनमा पनि नागरिकमैत्री सेवा, प्रभावकारी सुरक्षा व्यवस्था तथा अपराध नियन्त्रणलाई अझ सुदृढ बनाउँदै लैजाने प्रतिबद्धता व्यक्त गरेका छन् ।
पर्सा प्रहरीको यो उपलब्धिलाई सुरक्षा व्यवस्थापनमा गरिएको सक्रियता, समन्वय र जिम्मेवार कार्यशैलीको परिणामका रूपमा हेरिएको छ । स्थानीय स्तरमा शान्ति सुरक्षा कायम गर्न तथा नागरिकसँगको सम्बन्धलाई थप प्रभावकारी बनाउन पर्सा प्रहरीले पछिल्लो समय विभिन्न अभियान तथा जनचेतनामूलक कार्यक्रम सञ्चालन गर्दै आएको छ । 
प्रतिक्रिया दिनुहोस् !