वीरगंज (पर्सा), ३ जेगठ । अवैध लागू औषध सेवनकर्ता खोजी तथा सुधार महाअभियान सञ्चालन गरिरहेको जिल्ला प्रहरी कार्यालय पर्साले खैरो हिरोइनसहित दुई युवकलाई पक्राउ गरेको जनाएको छ ।
प्रहरीका अनुसार शनिबार राति करिब ९ः४० बजेको समयमा वीरगंज महानगरपालिका–३१ कटगेनवा सडकखण्डमा संयुक्त प्रहरी टोलीले शंकास्पद अवस्थामा गुडिरहेको ना ३९ प २५३२ नम्बरको स्प्लेण्डर मोटरसाइकल रोकी जाँच गरेको थियो । उक्त टोलीमा इलाका प्रहरी कार्यालय पटेर्वासुगौली र प्रहरी चौकी मिलनचोकका प्रहरी खटिएका थिए ।
जाँचका क्रममा मोटरसाइकलमा सवार दुवैले लगाएको पाइन्टभित्र लुकाइछिपाइ राखिएको प्लाष्टिकसहित ८ ग्राम ४० मिलिग्राम खैरो हिरोइनजस्तो देखिने पदार्थ फेला परेको प्रहरीले जनाएको छ । पक्राउ पर्नेमा वीरगंज महानगरपालिका–३२ परसवाका २० वर्षीय राहुल सिंह र बारा जिल्लाको जितपुरसिमरा उपमहानगरपालिका–७ खालका टोलका १९ वर्षीय नन्दन गुप्ता रहेका छन् ।
उनीहरूविरुद्ध लागू औषध नियन्त्रण ऐनअन्तर्गत मुद्दा दर्ता गरी थप अनुसन्धान अघि बढाइएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेत ले जानकारी दिए । 
प्रतिक्रिया दिनुहोस् !