गौर (रौतहट), २७ वैशाख । रौतहट प्रहरीले जिल्लामा बढ्दो लागुऔषध दुर्व्यसन नियन्त्रणका लागि ‘लागुऔषध नियन्त्रण तथा सेवनकर्ता खोजी एवं सुधार अभियान’ सञ्चालनमा ल्याएको छ ।
नेपाल–भारत सीमा क्षेत्र तथा जिल्लाको उत्तरी भेग चन्द्रनिगाहपुर आसपास लागुऔषधको प्रयोग र कारोबार बढ्दै गएपछि अभियान सुरु गरिएको जिल्ला प्रहरी कार्यालय रौतहटले जनाएको छ । प्रहरी उपरीक्षक सीताराम रिजालका अनुसार चालु आर्थिक वर्ष २०२/३ मा लागुऔषध कारोबारसम्बन्धी मुद्दामा २६ जनाविरुद्ध मुद्दा दर्ता गरिएको छ भने ६३ जनालाई पक्राउ गरिएको छ ।
उनले पक्राउ र कारबाही मात्रै पर्याप्त नभएकाले खोज, उपचार र सुधारलाई सँगसँगै अघि बढाउने उद्देश्यले अभियान सुरु गरिएको बताए । अभियानअन्तर्गत स्थानीय तहमा पुगेर सेवनकर्ताको पहिचान, तथ्याङ्क सङ्कलन, परामर्श, सचेतना तथा आवश्यक उपचार र पुनःस्थापनाका कार्यक्रम सञ्चालन गरिने जनाइएको छ ।
प्रहरीका अनुसार अभिभावक, शिक्षक, जनप्रतिनिधि, स्वास्थ्य संस्था तथा सामाजिक सङ्घसंस्थासँग सहकार्य गरी अभियान प्रभावकारी बनाइनेछ । यसैबीच, स्वास्थ्य कार्यालय रौतहटका प्रमुख राजेश सिंहका अनुसार जिल्लामा एचआइभी एड्स सङ्क्रमितको संख्या ५४० पुगेको छ । तीमध्ये ४२५ जनाले नियमित औषधि सेवन गरिरहेका छन् । 
प्रतिक्रिया दिनुहोस् !