वीरगंज (पर्सा), २४ वैशाख । पर्साका अभिभावकहरूले विद्यालयमा लागू गरिएको आइतबारको बिदा खारेज गर्न माग गरेका छन् । अभिभावक संघ पर्साले बिहीबार जिल्ला प्रशासन कार्यालय पर्सा र वीरगंज महानगरपालिकामा ज्ञापनपत्र बुझाउँदै विद्यालय नियमित सञ्चालन गर्न आग्रह गरेको हो ।
संघका अध्यक्ष सन्दीप साह नेतृत्वको टोलीले प्रमुख जिल्ला अधिकारी भोला दाहाल तथा वीरगंज महानगरपालिकाको शैक्षिक प्रशासन महाशाखाका प्रमुख आनन्द लामिछानेलाई छुट्टाछुट्टै ज्ञापनपत्र बुझाएको जनाएको छ । संघीय सरकारले सरकारी कार्यालयसँगै सामुदायिक तथा निजी विद्यालयमा पनि हप्तामा दुई दिन सार्वजनिक बिदा लागू गरेपछि पर्साका विद्यालयहरू शनिबार र आइतबार दुवै दिन बन्द हुँदै आएका छन् । तर, लगातार दुई दिन विद्यालय बन्द हुँदा विद्यार्थीहरूको अध्ययनमा नकारात्मक असर परेको अभिभावकहरूको भनाइ छ ।
अभिभावक संघका अनुसार अतिरिक्त बिदाका कारण पाठ्यक्रम समयमै सम्पन्न गर्न कठिनाइ भइरहेको छ भने शैक्षिक अनुशासन समेत कमजोर बन्दै गएको छ । अध्यक्ष साहले लामो बिदाले विद्यार्थीहरूमा अध्ययनप्रतिको रुचि घट्दै गएको र अधिकांश बालबालिका मोबाइल, टेलिभिजन तथा सामाजिक सञ्जालमा बढी समय बिताउन थालेको गुनासो बढेको बताए । संघले शिक्षा नियमावलीअनुसार विद्यालय वर्षमा कम्तीमा २२० दिन सञ्चालन हुनुपर्ने व्यवस्था स्मरण गराउँदै अनावश्यक बिदाले शैक्षिक गुणस्तरमा प्रत्यक्ष असर पारेको उल्लेख गरेको छ ।
विद्यार्थीहरूको नियमित पठनपाठन सुनिश्चित गर्न, सिकाइ वातावरणलाई प्रभावकारी बनाउन तथा बालबालिकालाई भविष्यप्रति जिम्मेवार बनाउन आइतबारको बिदा हटाउन आवश्यक रहेको अभिभावक संघको माग छ । ज्ञापनपत्र बुझाउन गएको टोलीमा संघका अध्यक्ष सन्दीप साहसँगै कोषाध्यक्ष कन्हैया पटेल, अरविन्द वर्णमाला, रविन्द्र गुप्ता, नरेन्द्र तिवारी, सुबोध यादव, हरेन्द्र तिवारी र धिरेन्द्र तिवारीलगायतको सहभागिता रहेको थियो । 
प्रतिक्रिया दिनुहोस् !