परवानीपुर (बारा), ७ वैशाख । पाँचौं परवानीपुर गोल्डकप फुटबल प्रतियोगिताअन्तर्गत सोमबार सम्पन्न रोमाञ्चक खेलमा वीरगंज युनाइटेड क्लबले सडेनडेथमा जित निकाल्दै प्रतियोगितामा शानदार सुरुवात गरेको छ । परवानीपुर खेल मैदानमा भएको प्रतिस्पर्धात्मक भिडन्तमा वीरगंज युनाइटेडले चिडियादह स्टार क्लब, रौतहटलाई ४–३ गोल अन्तरले पराजित गरेको हो ।
खेलको सुरुवातदेखि नै दुवै टोलीले आक्रामक शैली अपनाउँदै एकअर्कामाथि लगातार दबाब सिर्जना गरेका थिए । निर्धारित समयभित्र दुवै टोलीले समान प्रदर्शन गरेपछि खेलको निर्णय ट्राइब्रेकरमार्फत गरिएको थियो । पेनाल्टी सुटआउटमा पनि बराबरी भएपछि खेल सडेनडेथतर्फ धकेलिएको थियो, जहाँ वीरगंज युनाइटेडले निर्णायक गोल गर्दै जित आफ्नो पक्षमा पारेको हो ।
खेलमा उत्कृष्ट प्रदर्शन गरेका वीरगंज युनाइटेडका गोलकिपर तबरेज अन्सारी ‘म्यान अफ दि म्याच’ घोषित भए । उनले २१ सय रुपैयाँ नगद पुरस्कार प्राप्त गरे, जुन पर्सा जिल्ला फुटबल संघका उपाध्यक्ष हेमन्त चौरसियाले प्रदान गरेका थिए ।
प्रतियोगिताअन्तर्गत मंगलबारको खेल नव जन जागृति युवा क्लब, सिमरा र रिगल एन्फा क्लब, मकवानपुरबीच हुने आयोजकले जनाएको छ । संयोजक संजय मण्डलको अध्यक्षतामा सम्पन्न कार्यक्रममा उपाध्यक्ष चौरसियाले प्रतियोगिताको उद्घाटन गरेका थिए ।
वैशाख १२ गतेसम्म सञ्चालन हुने प्रतियोगितामा नेपालका सात तथा भारतको एक गरी कुल आठ टोली सहभागी छन्, सहसंयोजक दीपक यादवले जानकारी दिए । ‘राष्ट्रका लागि खेलकुद, स्वास्थ्यका लागि खेलकुद’ भन्ने नारासहित आयोजना गरिएको प्रतियोगिता करिब १७ लाख रुपैयाँको लागतमा सञ्चालन भइरहेको छ । प्रतियोगितामा विजेता टोलीले २ लाख रुपैयाँ तथा उपविजेताले १ लाख रुपैयाँ पुरस्कार प्राप्त गर्नेछन् ।
त्यसैगरी उत्कृष्ट डिफेन्डर, फरवार्ड, प्रत्येक खेलका उत्कृष्ट खेलाडी र समग्र प्रतियोगिताका उत्कृष्ट खेलाडीलाई समेत नगद पुरस्कार प्रदान गरिने आयोजक क्लबका अध्यक्ष सुबोध श्रीवास्तवले बताएका छन् ।
प्रतिक्रिया दिनुहोस् !