वीरगंज (पर्सा), १७ चैत । विशेष साहको नेतृत्वमा जेन जेड युथ फोर्स पर्साको महत्वपूर्ण बैठक मंगलबार वीरगंजमा सम्पन्न भएको छ। बैठकमा पर्सा जिल्लाभरका विभिन्न वडा र स्थानीय तहबाट उल्लेखनीय संख्यामा युवाहरूको सक्रिय सहभागिता देखिएको थियो, जसले संगठनप्रति युवाहरूको बढ्दो आकर्षण स्पष्ट पारेको छ ।
बैठकका क्रममा संगठनलाई अझ बलियो र प्रभावकारी बनाउने, युवा नेतृत्वलाई प्राथमिकतामा राख्ने तथा व्यापक रूपमा युवाहरूको सहभागिता विस्तार गर्ने विषयमा गहन छलफल गरिएको थियो ।
सहभागीहरूले संगठनलाई टोलदेखि जिल्ला तहसम्म सुदृढ बनाउँदै लैजाने स्पष्ट रणनीति आवश्यक रहेकोमा जोड दिएका छन् । छलफलबाट चाँडै टोल, वडा, पालिका, महानगर र जिल्ला स्तरसम्म संगठनका समिति गठन गर्ने निर्णय गरिएको छ । साथै, नयाँ युवाहरूलाई संगठनमा आबद्ध गराउने, भ्रष्टाचारविरुद्ध सशक्त अभियान सञ्चालन गर्ने तथा विभिन्न सामाजिक गतिविधिहरू अघि बढाउने ठोस योजना समेत तय गरिएको जानकारी दिइएको छ ।
कार्यक्रममा उपस्थित युवाहरूले समाजमा सकारात्मक परिवर्तन ल्याउने लक्ष्यसहित एकताबद्ध भएर अघि बढ्ने दृढ प्रतिबद्धता व्यक्त गरेका छन् । आयोजक पक्षले आगामी दिनमा संगठनलाई अझ व्यवस्थित, प्रभावकारी र सशक्त बनाउँदै लैजाने विश्वास व्यक्त गर्दै कार्यक्रम सम्पन्न गरेको छ ।
प्रतिक्रिया दिनुहोस् !