वीरगंज (पर्सा), १५ चैत । माउन्ट मकालु बोर्डिङ स्कुलका कक्षा १० मा अध्ययनरत विद्यार्थीहरूको विदाई समारोह भव्य र उत्साहपूर्ण वातावरणमा सम्पन्न भएको छ । विद्यालयका सञ्चालक कामेश्वर श्रीवास्तवको अध्यक्षता तथा सनलाइट कलेजका प्रिन्सिपल एवं प्याप्सनका वरिष्ठ सल्लाहकार आलोक चौरसियाको प्रमुख आतिथ्यमा कार्यक्रम आयोजना गरिएको थियो ।
कार्यक्रममा बोल्दै प्रमुख अतिथि चौरसियाले कक्षा १० उत्तीर्ण गरेपछि विद्यार्थीहरूको जीवनमा उच्च शिक्षाको नयाँ अध्याय सुरु हुने उल्लेख गर्दै स्पष्ट लक्ष्य निर्धारण गरी निरन्तर मेहनत गर्न प्रेरित गरे । उनले विद्यालयबाट सिकेका सकारात्मक पक्षहरूलाई जीवनमा आत्मसात् गर्दै नकारात्मक कुराहरूबाट टाढा रहन आग्रह गरे । साथै, विद्यालयले प्रदान गरेको शिक्षा भविष्यमा समाज र राष्ट्र निर्माणका लागि महत्वपूर्ण आधार बन्ने विश्वास व्यक्त गर्दै विद्यार्थीहरूको उज्ज्वल भविष्यको कामना गरे ।
त्यसैगरी, प्याप्सन महानगर सचिव तथा सन साइन बोर्डिङ स्कुलका सञ्चालक अमित आलोकले माउन्ट मकालु बोर्डिङ स्कुलले शैक्षिक गुणस्तरका साथै अतिरिक्त क्रियाकलापमा पनि उत्कृष्ट प्रदर्शन गरेको बताए । उनले विद्यालयका प्रिन्सिपल राहुल श्रीवास्तवको नेतृत्वमा विद्यार्थीहरूको प्रतिभा विकासमा उल्लेखनीय प्रगति भएको भन्दै विद्यालय परिवारलाई बधाई तथा शुभकामना व्यक्त गरे ।
उक्त कार्यक्रममा प्याब्सन महानगर सदस्य विजय कुमार बल, सल्लाहकार सन्नी पाख्रिङ, इनोभेटिभ सोसाइटी पर्साका अध्यक्ष कमल चौगाई, युवराज केशरी, निम्स इन्स्टिच्युटका अजय यादव, मानव सेवा आश्रमका देवेश मानव, माट्रिन मुक्तान तथा वीरगंज कपडा बैंकका अध्यक्ष लालबाबु सिंह लगायतले पनि शुभकामना मन्तव्य राखेका थिए ।
विदाई समारोहमा विद्यार्थीहरूले प्रस्तुत गरेका आकर्षक सांस्कृतिक नृत्यहरूले कार्यक्रमलाई थप रोचक र रमाइलो बनाएको थियो । कार्यक्रमको सञ्चालन इसा पटेल र विद्या शर्माले गरेका थिए । कार्यक्रमको अन्त्यमा विद्यालयका प्रिन्सिपल राहुल श्रीवास्तवले गुणस्तरीय शिक्षासँगै अतिरिक्त क्रियाकलापमा विद्यार्थीहरूको सक्रिय सहभागिता सुनिश्चित गर्न विद्यालय निरन्तर लागिपरेको उल्लेख गर्दै आगामी दिनमा अझ उत्कृष्ट उपलब्धि हासिल गर्ने प्रतिबद्धता व्यक्त गरे ।
सम्पूर्ण कार्यक्रम उत्साह, उमंग र भावनात्मक क्षणहरूका बीच सम्पन्न भएको थियो, जसले विद्यार्थीहरूलाई आगामी यात्राका लागि प्रेरणा र आत्मविश्वास प्रदान गरेको छ । 
प्रतिक्रिया दिनुहोस् !