वीरगंज (पर्सा), ५ चैत । उच्च अदालत जनकपुरको अस्थायी इजलास वीरगंजले हरि खेतान बहुमुखी क्याम्पस र हरि खेतान माध्यमिक विद्यालयलाई एउटै भवनमा सञ्चालन गर्न नपाइने स्पष्ट आदेश जारी गरेको छ । केही समयदेखि दुवै संस्था एउटै संरचनाभित्र सञ्चालन हुँदै आएको विषयमा परेको रिट निवेदनमाथि सुनुवाइ गर्दै अदालतले यस्तो निर्देशन दिएको हो ।
अदालतको आदेशसँगै अब दुवै शिक्षण संस्था छुट्टाछुट्टै भवनमा मात्र सञ्चालन गर्नुपर्नेछ भने व्यवस्थापन समेत फरक फरक कानुनी संरचना अन्तर्गत गर्नुपर्ने भएको छ । यस निर्णयले लामो समयदेखि चल्दै आएको व्यवस्थापकीय र कानुनी विवादलाई अन्त्यतिर लैजाने संकेत दिएको छ ।
शिक्षा ऐन २०२८ ले माध्यमिक तहका विद्यालय र विश्वविद्यालयअन्तर्गतका क्याम्पसहरूलाई अलग अलग कानुनी ढाँचामा सञ्चालन गर्नुपर्ने व्यवस्था स्पष्ट रूपमा गरेको छ । त्यस्तै त्रिभुवन विश्वविद्यालयको कार्यकारी परिषद्ले जारी गरेको ‘सम्बन्धन सम्बन्धी विनियम २०७३’ ले पनि एउटै भवनमा विद्यालय र क्याम्पस सञ्चालन गर्न नपाइने उल्लेख गरेको छ ।
कानुनी प्रावधानअनुसार क्याम्पस प्रमुख र विद्यालयका प्रधानाध्यापक अलग अलग व्यक्ति हुनुपर्ने भएपनि, हालसम्म क्याम्पस प्रमुखले विद्यालयको प्रशासनिक कामकाजमा समेत हस्तक्षेप गर्दै आएको आरोप लाग्दै आएको थियो । सञ्चालक समितिले पटक पटक शिक्षा ऐनअनुसार विद्यालय सञ्चालन गर्न आग्रह गरे पनि त्यसलाई बेवास्ता गरिएको स्रोतले जनाएको छ ।
अदालतको यो आदेशपछि अब सम्बन्धित पक्षहरूलाई कानुनअनुसार संरचना मिलाउँदै छुट्टै व्यवस्थापनमा जानुपर्ने अवस्था सिर्जना भएको छ ।
प्रतिक्रिया दिनुहोस् !