वीरगंज (पर्सा), १८ फागुन । पर्सा–१ मा आगामी प्रतिनिधिसभा निर्वाचनको माहोल दिनप्रतिदिन तातिँदै गएको छ । यसबीच प्रदीप यादवलाई लिएर मतदाताबीच व्यापक बहस देखिएको छ । नेकपा (एमाले)का उम्मेदवारका रूपमा चुनावी मैदानमा उत्रिएका यादवलाई धेरै मतदाताले ‘निर्विकल्प’ विकल्पको रूपमा प्रस्तुत गरिरहेका छन् ।
पर्सा–१ का विभिन्न वडा र टोलमा सञ्चालन भइरहेको घरदैलो, भेटघाट तथा अन्तरक्रिया कार्यक्रममा स्थानीयले पूर्व मन्त्रीसमेत रहेका यादवले विगतमा उठाएका विकासका एजेन्डा स्मरण गरेका छन् । सडक पूर्वाधार, खानेपानी, शिक्षा र स्वास्थ्य क्षेत्रमा भएका पहललाई उल्लेख गर्दै यसपटक स्पष्ट जनमत दिनुपर्ने धारणा व्यक्त भइरहेको छ ।
‘हामीले धेरै अनुहार देख्यौं, अब काम गर्ने मान्छे चाहियो,’ वीरगंजका एक मतदाताले भने, ‘पर्सा–१ लाई अगाडि बढाउन प्रदीप यादव नै सही विकल्प हुन् ।’ यद्यपि अन्य दलका उम्मेदवार पनि सक्रिय देखिए तापनि मतदाताको ठूलो हिस्साले स्थिर नेतृत्व र निरन्तर पहलको आवश्यकता औंल्याएका छन् । विशेषगरी युवाहरूले रोजगारी सिर्जना, उद्योग प्रवद्र्धन तथा सीमा क्षेत्रका समस्याको दीर्घकालीन समाधानलाई मुख्य चुनावी मुद्दा बनाउनुपर्ने बताएका छन् । उनीहरूका अनुसार यी विषयमा यादवले स्पष्ट योजना अघि सारेका छन् ।
दुई पटक सांसद भइसकेका यादव पुनः उम्मेदवार बनेसँगै पर्सा–१ मा प्रतिस्पर्धा रोचक देखिएपनि मतदाताको ध्यान विकास र कामको मूल्याङ्कनतर्फ केन्द्रित हुँदै गएको विश्लेषण गरिन्छ । यसले उम्मेदवारको व्यक्तिगत छवि र विगतको कार्यशैली निर्णायक बन्न सक्ने संकेत देखाएको छ । निर्वाचन नजिकिँदै जाँदा घरदैलो, आमसभा र सामाजिक सञ्जालमार्फत प्रचार अभियान तीव्र बन्दै गएको छ । तर पर्सा–१ का धेरै मतदाताको साझा भनाइ छ ‘अब आश्वासन होइन, परिणाम चाहियो ।’ उनीहरूका अनुसार त्यो परिणाम दिलाउन सक्ने उम्मेदवारका रूपमा प्रदीप यादव अगाडि देखिएका छन् ।
प्रतिक्रिया दिनुहोस् !