वीरगंज (पर्सा), १६ माघ । शहीद दिवसको अवसरमा वीरगञ्जमा विभिन्न राजनीतिक दलका नेता तथा सर्वसाधारण नागरिकहरूले देश, लोकतन्त्र र जनअधिकारका लागि जीवन बलिदान गर्ने वीर शहीदहरूप्रति श्रद्धाञ्जली अर्पण गरेका छन् ।
यस अवसरमा जनता समाजवादी पार्टीका नेता तथा पर्सा–१ प्रतिनिधिसभा उम्मेदवार राम नरेश यादवले आयोजित कार्यक्रममा शहीदको शालिकमा माल्यार्पण गर्दै भावपूर्ण श्रद्धासुमन अर्पण गरेका थिए । श्रद्धाञ्जली कार्यक्रमपछि बोल्दै नेता यादवले शहीदहरूको त्याग र बलिदानकै कारण आजको लोकतान्त्रिक व्यवस्था सम्भव भएको बताउँदै वीर शहीदहरू सधैँ अमर रहने धारणा व्यक्त गरे ।
कार्यक्रममा सहभागी अन्य नेताहरू तथा नागरिकहरूले पनि शहीदहरूको योगदान स्मरण गर्दै लोकतन्त्र, सुशासन र राष्ट्रिय एकताको महत्व औँल्याएका छन् । साथै, शहीदले देखेको समुन्नत, न्यायपूर्ण र समावेशी नेपालको निर्माणमा सबैले प्रतिबद्ध भएर अघि बढ्ने संकल्प व्यक्त गरेका छन् ।
यसैगरि पर्सा क्षेत्र नम्बर २ का रास्वपाका उम्मेदवार सुशील कुमार कानुले शहिद दिवसको अवसरमा मधेस आन्दोलनका शहिदहरुको सालिकमा श्रद्धाञ्जली अर्पण गरेका छन् । शुक्रबार शहिद दिवसको अवसरमा वीरगंजको घण्टाघरस्थित मधेशी शहिद स्मारक पार्कमै पुगेर रास्वपा उम्मेदवार कानुले मधेश आन्दोलनका शहिदहरु धर्मराज सिंह, दिलिप चौरसिया, सोहन साह कलवार, भोलाप्रसाद तेली, दिनानाथ साह गोढ, शत्रुधन पटेल र आशीष रामको सालिकमा पुष्पगुच्छा अर्पण गर्दै श्रद्धाञ्जली दिएका हुन् ।
त्यसअवसरमा रास्वपा उम्मेदवार कानुले शहिद दिवसका दिनपनि मधेश केन्द्रित दलहरुको खासै चासोमा नपरेका मधेश आन्दोलनका शहिदहरुले मधेशीका लागि दिएको बलिदानी आँफ्नो दिल र दिमागमा ताजा नै रहेकाले शहिद स्मारकमा पुगेर श्रद्धाञ्जली दिएको बताए ।
प्रतिक्रिया दिनुहोस् !