वीरगंज (पर्सा), १६ माघ । पर्सा क्षेत्र नम्बर-१ का नेकपा एमालेका उम्मेदवार प्रदीप यादवले शहीदहरूको त्याग र बलिदानकै कारण नेपाल आजसम्म स्वतन्त्र तथा सार्वभौम राष्ट्रका रूपमा कायम रहन सफल भएको बताएका छन् ।
शहीद दिवसको अवसरमा नेपालमा राजनीतिक परिवर्तनका लागि भएका विभिन्न आन्दोलनमा ज्यान अर्पण गर्ने सम्पूर्ण शहिदप्रति श्रद्धाञ्जली अर्पण गर्दै पूर्वमन्त्रीसमेत रहेका यादवले सामाजिक सञ्जालमार्फत आफ्नो धारणा सार्वजनिक गरेका हुन् । उनले आफ्नो फेसबुक पेजमा लेख्दै देश, लोकतन्त्र र जनअधिकारका लागि अमूल्य जीवन समर्पण गर्ने सबै शहिदप्रति हार्दिक श्रद्धाञ्जली व्यक्त गरेका छन् । पर्सा-१ का निवर्तमान सांसदसमेत रहेका यादवले शहिदहरूले देखाएको सपना साकार पार्नु सम्पूर्ण नेपाली नागरिकको साझा जिम्मेवारी भएको उल्लेख गरेका छन् ।
शहीदहरूको बलिदानकै कारण आज प्रत्येक नेपालीले आफूलाई सार्वभौम नागरिकका रूपमा गर्व गर्न पाएको बताउँदै उनले राणा शासन, पञ्चायती व्यवस्था, पहिलो र दोस्रो जनआन्दोलन, मधेश आन्दोलन तथा हालै सम्पन्न जेन–जी आन्दोलनमा शहादत प्राप्त गर्ने सबै शहिदको योगदानलाई शहीद दिवसका अवसरमा नमन गरेको जनाएका छन् ।
उनले शहिदहरूले देखाएको मार्गलाई आत्मसात गर्दै त्यसै मार्गमा निरन्तर अघि बढ्ने प्रतिबद्धता समेत व्यक्त गरेका छन् ।
प्रतिक्रिया दिनुहोस् !